Kuberkrakers slaan toe op Krygkor

Die rekenaarstelstel van die wapenaankoper, Krygkor is deur kuberkrakers binnegedring, en sodoende is daar na bewering toegang tot vertroulike inligting van bykans 20 000 verskaffers gekry.

Die kuberkrakers wat werk onder die vaandel, “Operation Africa”, het die instelling se rekeningstelsel binnegedring.

Die lêers waartoe hulle toegang gekry het, sluit blykbaar bestellings- en betalingsbesonderhede in van maatskappye, waaronder Airbus, die Thales-groep, Rolls Royce en Denel tel.

‘n Kuberkraker het aan HackRead.com vertel die kuberkrakers het toegang gekry tot meer as 19 900 ID’s, name en rekenaar-toegangskodes van verskaffers.

Krygkor stel glo nog ondersoek in oor die voorval en wou geen kommentaar aan die media daaromtrent lewer nie.

Krygkor was onlangs in die nuus oor ‘n omstrede tender vir die huur van ‘n interkontinentale vliegtuig vir die baie belangrike persone (BBP’s) van die ANC-regime.

Vroeër vanjaar het Anonymous se kuberkrakers onder die vaandel “Operation Africa” aangekondig dat hulle beplan om korrupte Afrika-regerings te teiken.

Intussen is al toegeslaan op die webblaaie van onder andere die SABC, van die Gupta-familie se sake-ondernemings, die EFF en Zanu-PF in Zimbabwe.

 Bron: Vryburger


Enjoyed this post? Share it!