Landbou organisasie TLU reik waarskuwing uit ná 5 aanvalle in een naweek

Die landbou-organisasie TLU SA het Sondagaand mense op plase en kleinhoewes gemaan om hul veiligheid op te skerp en altyd op hul hoede wees vir moontlike aanvalle.

Dit kom nadat daar sowat vyf aanvalle oor die naweek plaasgevind het. Vier mense is in die aanvalle dood.

Henry Geldenhuys, voorsitter van die veiligheids­komitee van TLU SA, het gesê volgens hul statistieke was daar vandeesmaand al 23 aanvalle waarin ses mense dood is. Daar was die afgelope jaar 277 aanvalle waarin 55 mense dood is.

Ian Cameron, AfriForum se hoof van gemeenskapsveiligheid, het gesê die jongste moord het Saterdagaand op die R24 in Maanhaarrand in Noordwes plaasgevind. Die eienaar van die Big Creek Lodge, Arno Niehaus (53), is deur twee mans beroof en verwurg.

Twee mans het na 22:00 vir ’n kamer gevra, aldus Cameron.

“Die mans het toe toegang tot die perseel gekry en dit is onduidelik wat daarna gebeur het. Niehaus se seun het vanoggend (Sondagoggend) sy lyk gekry.”

* Anton Smuts (64), ’n boer van Kinross in Mpumalanga is ook Saterdag vermoor. Volgens Geldenhuys, is hy op sy plaas doodgeskiet en sy lyk in sy bakkie gelaai.

“Die verdagtes het toe sy lyk na die Afghanistan-plakkerskamp geneem en dit daar in sy motor aan die brand gesteek,” het Geldenhuys gesê.

Inwoners van die omgewing het Saterdagaand die brandende bakkie gesien en die oewerhede ontbied.

* Piet van Zyl (69) en sy vrou Tilla (66) is op hul plaas in die Immerpan-omgewing ook Saterdagaand doodgeskiet.

Luidens ’n verklaring wat deur TLU SA uitgereik is, was daar vyf aanvallers. Lees: Bekende renosterboer en vrou vermoor.

* James Munroe, ’n boer op die Ncaduzi-plaas in Barberton, was Sondagoggend saam met twee ander mense in die huis toe drie gewapende aanvallers deur ’n badkamervenster ingekom en hulle oorval het.

Volgens TLU SA is almal vasgebind.

“ ’n 9mm vuurwapen is drie keer op Munroe gerig, maar geen skoot is afgevuur nie. Hy is toe met die vuurwapen oor die kop geslaan en het ’n wond aan die agterkop opgedoen.”

’n Skootrekenaar, DVD speler, ’n selfoon en die bakkie se sleutels is gebuit. Die bakkie self is nie gesteel nie.

’n Handdoek en mes is deur die rowers laat val, en sal as bewysstukke dien.

Nog niemand is in hegtenis geneem nie en ’n polisieondersoek duur voort.

DAAR WAS DIE AFGELOPE JAAR 277 AANVALLE WAARIN 55 MENSE DOOD IS


Enjoyed this post? Share it!