Lesufi wil die Afrikaner kultuur uit skole verwyder

Die verandering van bepaalde Afrikaanse skoolname in Sentraal-Transvaal is tans volgende op die provinsie se LUR vir onderwys, Panyaza Lesufi, se lysie.

Skole “met ‘n naam wat aanstoot kan gee” is in ‘n departementele omsendbrief gevra om hulle name te heroorweeg.

Voorts wil die departement die betrokke beheerliggame aanmoedig om die skoolname, slagspreuke en embleme te hersien.

Op die agenda is uiteraard veral skole wat genoem is na ‘n persoon uit die vorige regeringstydperk en glo sou bygedra het tot die ondermyning van menseregte.

Die net word egter veel wyer gespan deur skole te betrek met ‘n naam wat ‘n negatiewe konnotasie het vir enige lid van die publiek. Dit word ook uitgebrei na ‘n embleem of slagspreuk wat aanstoot sou kon gee.

Volgens die Vereniging vir Onderwysreg se voorsitter, dr. Jean van Rooyen, kan openbare skole as ‘n “regspersoon” beskou word en is die departement se planne nie regtens afdwingbaar nie.

Lesufi het egter al meer as een keer gedreig dat skole net tot September kans het om hulle name vrywillig te verander.

Van die bespiegelinge is dat die departement onder andere drie Pretoriase skole in sy visier het, naamlik Hoërskool Hendrik Verwoerd, Hoërskool Gerrit Maritz en die Hoër Tegniese Skool John Vorster.

Bykans enige skoolnaam uit die Afrikaner-geskiedenis sou uiteindelik in die slag kon bly in die jongste vendetta. Die aanslag op embleme en slagspreuke is ook gemik teen die Afrikaner-kultuur.

Bron: Vryburger


Enjoyed this post? Share it!