Ligte sneeu op Kaapse berge verwag

Met ligte sneeuval wat na verwagting Maandag oor die bergpieke van die Matroosberge en in die Ceres-omgewing gaan val, klap die tande van inwoners in dié gebied reeds.

Didi de Kock, eienaar van die Matroosberg-natuurreservaat buite Ceres, het Maandagoggend gesê hulle bibber van die koue.

 “Dit reën omtrent lekker hier by ons. Alles is sopnat buite en dit is vrek koud. Ons is omtrent geseënd en kla glad nie. Ná die droogte het ons dit nodig,” sê sy.

Ligte sneeu word teen Maandagmiddag hier verwag, sê De Kock.

Vir Maandag het die Suid-Afrikaanse weerkantoor ’n minimum van 2°C vir Ceres voorspel wat na verwagting Dinsdag tot vriespunt sal daal.

Inwoners van Sutherland het teen Maandagoggend nog nie dié nat en koue weer ervaar nie.

Minimumtemperature hier was Maandag 8°C en daal Dinsdag tot -5°C en Woensdag tot -7°C.

“Jong, dit is nie té koud nie. Dit was Sondag gedeeltelik bewolk. Dit het ook nie geryp nie,” sê Rita Wagener eienaar van die Kambrokind-gastehuis op Sutherland.

Volgens haar man, Jurg, is die aanvoelbare temperatuur sowat 7°C en lyk dit of dit “wil-wil reën”.

“Die toestande vir sneeu is nog nie heeltemal reg nie. Hier waai egter ’n sterk wind,” sê hy.

* Volgens www.snowreport.co.za is die kans op ligte sneeu vandag groot oor die Hottentots Holland-, Ceres- en Matroosberge.

Bron: Netwerk 24


 

Enjoyed this post? Share it!