Maak vier moorde nou prioriteit

Die moordondersoek na die uitwissing van ‘n hele familie op ‘n kleinhoewe by Rodora naby Randfontein moet geprioritiseer word, het die Front Nasionaal Suid-Afrika by die waarnemende polisiehoof, Khomotso Phahlane geëis.

Die party het voorts versoek dat ‘n senior ondersoekbeampte aangestel moet word weens die wyse waarop die ondersoek na die koelbloedige moorde op Kenneth McCormack (42 jaar), sy pa Monty (73 jaar en ‘n Britse burger), die verloofde van McCormack jr., Marietjie Meyer (46 jaar) en haar 9-jarige dogter, Kayla, die afgelope maande hanteer is.

Drie maande na die moord kon die ondersoekbeampte nie ‘n saaknommer aan oorlewende familielede verskaf nie. Hy het hulle volgens hul weergawe afgejak wanneer hulle navraag gedoen het omdat hulle glo lastig sou wees, skryf FN SA se inligtingsbeampte JD Lötter in sy brief.

‘n SAPD-woordvoerder in Sentraal-Transvaal, kaptein Kay Makhubele het egter die party meegedeel dat daar wel ‘n saaknommer is, maar niemand is nog in hegtenis geneem nie en die ondersoek duur voort.

Volgens Lötter lyk dit asof daar niks gedoen is nie, maar indien die moorde wel verband hou met ‘n loondispuut soos aanvanklik aangevoer is dan kan dit tog nie te moeilik wees om die verdagtes op te spoor en aan te keer nie.

Juis daarom het die party sy kommer uitgespreek oor die hantering van die saak en versoek dat dit geprioritiseer moet word en ‘n senior ondersoekbeampte dit moet hanteer.

Phahlane is gevra om in te gryp oor die saak.

Foto – Kayla Meyer

Bron- Vryburger


Enjoyed this post? Share it!