Maimane vat NVG aan oor 783 klagte teen Zuma

Zuma_ewn-jpgMaimane vat NVG aan oor 783 klagte teen Zuma
  “Hou op voete sleep en laat geregtigheid geskied.”

Dit is Mmusi Maimane, DA-leier, se boodskap aan die nasionale vervolgingsgesag (NVG) oor die 783 klagte wat verband hou met korrupsie, bedrog en rampokkery teen pres. Jacob Zuma.

Maimane het ’n skrywe aan adv. Shaun Abrahams, direkteur van openbare vervolgings, gerig waarin hy hom vra om in die openbaar klarigheid te gee oor of hy die klagte teen Zuma gaan herinstel.

 Volgens Maimane is die spertyd hiervoor Vrydag, 13 Mei.

Abrahams het geantwoord dat respondente 15 dae ná ’n beslissing het om aan te dui of hulle appèl gaan aanteken.

Abrahams het gesê hy sal voor of op dié datum aandui wat sy planne is.

In sy verklaring sê Maimane dat dit Vrydag 14 dae sal wees nadat die hooggeregshof bevind het dat die besluit om die 783 klagte teen Zuma te laat vaar, irrasioneel was.

“Volgens ons eie regsmening is die klagte outomaties heringestel as gevolg van die eenparige beslissing,” het Maimane gesê.

“Terwyl die DA die NVG se onafhanklikheid respekteer, kan ons nie vergeet nie dat dit ’n hofstryd van 7 jaar was om die baie belangrike beginsel dat elke Suid-Afrikaner – maak nie saak hoe magtig nie – gelyk voor die reg behandel word, te verseker.”

“Dit is nou tyd om pres. Zuma sy dag in die hof te gee en om hom die geleentheid te gee om homself te verdedig, sonder vrees of voorbehoud, teen die 783 klagte van korrupsie, bedrog en rampokkery waardeur hy nou in die gesig gestaar word,” het Maimane gesê.

Nosiviwe Mapisa-Nqakula, minister van verdediging, het vroeër op ’n mediakonferensie ná Woensdag se kabinetsvergadering gesê die kabinet het “kennis geneem” van die hofuitspraak.

“Die kabinet doen ’n beroep op die samelewing om die NVG toe te laat om onafhanklik sy grondwetlike pligte in terme van Artikel 179(5) van die Grondwet uit te voer sonder enige onbehoorlike druk uit enige oord,” lui die kabinet se verklaring. Bron- Netwerk24

Enjoyed this post? Share it!