Malema: As boere wéér betoog, sal EFF hulle ‘ontmoet’

Julius Malema het Donderdagmiddag uitgevaar teen die betogings wat op Swart Maandag plaasgevind het.

Malema het saam met EFF-lede deelgeneem aan ’n betoging voor die Israelse ambassade in Pretoria teen die “kaping van Palestina”.

“Bevry die mense van Palestina,” het die leier van die EFF gesê.

“Dit is nonsens wat wit Afrikaners Maandag aangevang het in Tshwane. Ons ondersteun nie sulke nonsens nie.

“Wat nog erger is, is dat die polisie bang is vir wit mense. In plaas daarvan om hulle te skiet met rubberkoeëls, het hulle foto’s geneem van die wit mense . . . terwyl hulle die stad Tshwane ontwrig het,” sê Malema.

Hy sê die polisie het ’n geleentheid misgeloop om wit mense se velle te toets met rubberkoeëls. Die minister van polisie het nie eens polisiebeamptes beveel om die “rassiste” te skiet wat deelgeneem het aan Swart Maandag nie.

“Hulle het ons paaie versper en hulle het ons kinders verhoed om hul finale matriekeksamens te skryf. Die nuttelose polisie van die stad Tshwane! Hulle het niks gedoen aan rassisme nie al het hulle dit Maandag gesien.”

Malema het verder gesê die ANC is bang vir wit mense, Israel en Afrikaners, en dít is hoekom dié party niks oor Swart Maandag gedoen het nie.

Hy sê die EFF sal op dieselfde dag wat boere weer beplan om te betoog, ’n teenbetoging hou.

“Ons kan nie wit mense toelaat om te doen wat hulle wil in hierdie land nie. Laat hulle die datum aankondig waarop hulle terugkom Tshwane toe en laat ons hulle gaan ontmoet.”

Die gewoonlik stil, voorstedelike strate van Lynnwood in Pretoria is ontwrig toe honderde EFF-ondersteuners in rooi T-hemde en barette opgedaag om na Malema te luister te midde van ’n groot polisieteenwoordigheid.

“Dít wat in Palestina gebeur, is besig om ondergronds in Suid-Afrika te gebeur onder die heerskappy van die ANC. Ons moet dit nie toelaat nie,” het Malema gesê.

Hy sê dit wat in Palestina gebeur, herinner hom aan Suid-Afrika se eie moeilike verlede.

Malema het gesê die EFF sal elke jaar op die herdenking van die Balfour-verklaring byeenkom om te betoog.

Sowat 600 betogers het opgedaag om te luister na hul leier, Julius Malema.

Die Balfour-verklaring is tydens die Tweede Wêreldoorlog deur die Britse regering uitgereik om hul ondersteuning te verklaar vir die vestiging van ’n nasionale tuiste vir die Joodse mense in Palestina.

“Kom ons laat mense verstaan dat daar mense is wat steeds ly onder die onderdrukking deur Israel wat ondersteun word deur Brittanje en Amerika,” het Malema gesê.

“Wat Israel aan Palestina doen is verkeerd. Ons staan nie saam met die kolonialiseerders nie.”

Deur: Netwerk 24


Enjoyed this post? Share it!