Man ure lank bewusteloos ná aanval in George

’n Man is eers meer as 36 uur nadat hy vasgebind is en van waardevolle besittings in ’n huis in George beroof is, bevry.

Die man (36) se nagmerrie-ondervindig het reeds Vrydag kort ná 22:00 begin en nadat die polisie se hulp Sondag ontbied is, is hy kort voor 11:30 bevry.

HY IS OORROMPEL EN OOR DIE KOP GESLAAN. HY HET SY BEWUSSYN VERLOOR.

Kapt. Malcolm Pojie, polisiewoordvoerder, sê die voorval het by ’n huis in Laingstraat baie naby aan die sentrale stadskern plaasgevind.

Die man woon in die huis en die eienaar was die naweek uitstedig.

 Hy het Vrydagaand saam met mense partytjie gehou. Later het hy gaan slaap. Omstreeks 22:10 het hy stemme in die huis gehoor en ondersoek ingestel.

Hy is oorrompel en oor die kop geslaan. Hy het sy bewussyn verloor.

Hy het eers Saterdagoggend weer sy bewussyn herwin en agtergekom hy is vasgebind. Daar was ook ’n sokkie in sy mond – vermoedelik deur sy aanvallers ingedruk sodat hy nie ’n lawaai kan maak nie.

Die huis se eienaar het intussen herhaaldelik telefonies met hom in verbinding probeer tree.

Toe hy niks hoor nie, het hy onraad vermoed en Sondag ’n slotmaker gevra om ondersoek te gaan instel.

Die slotmaker en ’n helper het by die huis vasgestel dat ’n skuifdeur aan die kant van die huis verwyder is. Hulle het toe die polisie ontbied.

Die polisie het op die vasgebinde man afgekom en hom bevry.

’n Rekenaar, selfoon en R2 000 kontant is gesteel.

Enigiemand met meer inligting kan ao. Jerome Malan bel by 082 297 9629 of gedurende kantoorure by 044 803 4715.

Bron – Netwerk24


 

Enjoyed this post? Share it!