Massiewe Bende Infiltreer Vodacom. Skelms Regeer, Ons Betaal, Besigheid Maak Wins en Die Wet is Dood

Die Valke wil nou die hulp van die Amerikaanse federale speurdiens (FBI) inroep nadat hulle snuf in die neus gekry het van ’n massiewe sindikaat wat glo Vodacom geïnfiltreer het vir onwettige SIM-ruilings om internetbankbedrog te pleeg. Boonop het Rapport vandag onthul dat elektroniese bank­bedrog meer as verdubbel het sedert die vorige jaar.

Die Suid-Afrikaanse Bankrisiko-inligtingsentrum (Sabric), wat deur Nedbank, Standard Bank, Absa en FNB gestig is om intelligensie oor handelsmisdaad tussen hulle te deel, het dié week gesê hy is ongemaklik daarmee om dié inligting in die openbaar te deel. Sabric publiseer wel jaarliks ander statistieke, soos kredietkaartbedrog.

 ’n Afskrif van Sabric se elektroniesebankbedrog-verslag wat Rapport kon bekom, toon R200,8 miljoen is al in die eerste ses maande van vanjaar geteiken. Vir die hele 2015 was dit R137,5 miljoen.

Dit is onduidelik hoeveel van dié geld herwin kon word.

Die getal bedrogondersoeke wat die banke begin het, was al 8 254 teen Junie 2016, terwyl dit 8 401 vir die hele 2015 was.

Verlede jaar kon die banke altesame 5 612 uitvissingswebtuistes (phishing) sluit, terwyl hulle in ses maande dié jaar net 1 968 kon toemaak.

Rapport het vroeër die maand berig die Valke ondersoek die moontlikheid dat ’n sindikaat toegang tot Absa-kliënte se rekeninge verkry het en besig is om miljoene rande van hulle te steel.

Dit blyk egter dié sindikaat het sy net veel wyer gegooi om verskeie banke én selfoonnetwerke te teiken.

Tientalle kliënte kla dat banke hulle nie wil help nie omdat hulle hoor die “enigste” manier waarop die bedrog kon gebeur, is as die kliënt nalatig was.

Maar korrespondensie tussen die Valke wat hul voorlopige ondersoekwerk uiteensit en waarvan Rapport ’n afskrif gesien het, skets ’n ander prentjie.

Die dokument sê ’n internasionale sindikaat het werknemers van ­Vodacom se inbelsentrum in Johannesburg gewerf om onwettige SIM-ruilings te doen sodat hulle internet­bedrog kan pleeg.

In die een geval wat die Valke uitlig, kan ’n enkele selnommer verbind word met 392 ander nommers, wat beteken booswigte het waarskynlik probeer om SIM-ruilings op dié nommers te doen.

“Konsultasie met ander selfoonnetwerke wys die sindikaat het die hele selfoonbedryf geïnfiltreer en kan toegang tot enige selfoon kry wat hulle nodig het om ’n misdaad mee te pleeg,” lui die skrywe wat aan die nasionale hoof van die Valke gerig is.

Vodacom het drie weke gelede geweier om te sê hoeveel werknemers hulle al gepak het oor onwettige SIM-ruilings.

Vrydag het ’n Vodacom-woordvoerder gesê: “Ons kan bevestig dat ’n ondersoek aanhangig is rakende ’n beweerde SIM-ruiling- sindikaat, maar kan weens die sensitiwiteit van die saak nie verder kommentaar lewer nie.

“Vodacom neem enige onwettige bedrywighede binne die netwerk baie ernstig op en het ’n forensiese span wat alle bewerings van bedrog ondersoek. Ons pas ook gereeld ons veiligheidsmaatreëls aan om ons kliënte teen bedrog te beskerm.”

Uit die Valke se dokumente blyk dit die probleem is steeds groter as dié omruilings. Die ondersoekers sê hulle moet dringend die FBI en ander internasionale agentskappe raadpleeg.

Een van die beweerde baasbreine word genoem: Ene “Mike” is in Nigerië gearresteer vir kuberbedrog ter waarde van sowat $60 miljoen (R829 miljoen).

News24 het in Augustus berig dat “Mike” in hegtenis geneem is en vermoedelik ’n netwerk van minstens 40 mense in Suid-Afrika, Nigerië en Maleisië bedryf het, wat skadelike sagteware (malware) gebruik om internetbedrog te pleeg.

Luidens die Valke se memo word bedrogklagte wat kliënte plaaslik indien amper outomaties op stasievlak as “onopgelos” afgesluit.

Brig. Hangwani Mulaudzi, Valke-woordvoerder, wou weens die sensitiwiteit van die ondersoek nie uitbrei oor die vordering of besonderhede van die saak nie.

“Die ondersoek het wel die vorm van ’n projek aangeneem,” sê hy. By navraag het Sabric gesê die toename in voorvalle kan in ’n mate toegeskryf word aan ’n toename in die getal kliënte wat met hul selfone en rekenaars banksake doen. “Die bankbedryf is bekommerd oor die opvallende toename in elektroniese misdade die afgelope jaar,” sê Susan Potgieter, bestuurder van Sabric se inligtingsentrum.

Sy sê dit is nie seker presies hoeveel geld banke en hul kliënte jaarliks verloor nie omdat banke in baie gevalle die bedrieglike transaksies kon keer voor geld onttrek is, of ’n deel van die geld kon terugkry.

So word SIM kaarte geruil en geld gesteel:

Internet-banking-and-SIM-swap-fraud

Rapport


Lees ook: Bedrog met geboortesertifikate


 

Enjoyed this post? Share it!