MDC vra hulp ‘want Zimbabwe brand’

 Die Movement for Democratic Change (MDC) het ’n beroep op die Suider-Afrikaanse Ontwikkelingsgemeenskap (SAOG) gedoen om in Zimbabwe in te gryp nadat minstens 20 mense Maandag in hegtenis geneem is ná ’n geveg tussen taxibestuurders en polisie in die hoofstad Harare.

“Zimbabwe brand. (Lande in) die streek kan nie hande gevou sit terwyl die toestand in ’n lidland vererger nie,” sê dié opposisieparty se woordvoerder, Obert Gutu.

Die voorvalle in Harare volg op erge geweldpleging die afgelope paar dae in die grensdorp Beitbrug waar ’n pakhuis van die regering en ’n kitskoswinkel afgebrand is. Verkeersligte is beskadig en paaie is met klippe versper.

 Volgens die staatsuitsaaier in Zimbabwe het die polisiewoordvoerder Charity Charamba gesê daar is ook op tien busse beslag gelê tydens botsings tussen taxibestuurders en die polisie in die Epworth-, Mabvuku- en Ruwagebiede van Harare.

Die geweldpleging is uitsonderlik in ’n land waar pres. Robert Mugabe reeds sowat 35 jaar lank met ’n ystervuis regeer.

Die betogings by Beitbrug het gespruit uit ongelukkigheid oor streng nuwe invoerregulasies wat op 17 Junie deur die Zimbabwiese regering aangekondig is. Die regering het onder meer die invoer van gebottelde water, mayonnaise, meubels en aartappelskyfies vanuit Suid-Afrika verbied om “plaaslike handel te bevorder”.

Die gewledpleging hou glo verband met die swak ekonomiese toestande in die land wat volgens betogers die gevolg is van wanbestuur deur die regering.

Die staatsbeheerde Zimbabwiese koerant Sunday Mail berig die land se owerhede pak die skuld vir die geweld op “misdadige elemente” wat nie direk betrokke is by oorgrenshandel nie omdat Zimbabwiërs gewoonlik “vreedsaam” betoog.

Bron: Netwerk24


 

Enjoyed this post? Share it!