Minister ontken sy oortree die wet

Die minister van verdediging, Nosiviwe Mapisa-Nqakula, het haar besluit om ’n jong Burundiese vrou by te staan om Suid-Afrika met ’n straalvliegtuig van die staat binne te kom, verdedig.

“Ek het geen berou nie . . . dit was die regte ding om te doen,” het sy gesê en beweer sy het die vrou “van ’n lewe van mishandeling” gered.

Mapisa-Nqakula se reddingsdaad het ’n storm ontketen, met die DA wat beweer die minister het die staat se hulpbronne misbruik en die wet verontagsaam, het dieSunday Times berig.

Die DA het voorts gesê prosedures moet gevolg word voordat ’n humanitêre sending uitgevoer word en gevra dat die minister in die parlement verantwoording moet doen.

Mapisa-Nqakula het, aldus die koerant, ’n familievriend, Michele Wege, twee jaar gelede met vals reisdokumente die land “binnegesmokkel” vanuit die Demokratiese Republiek van die Kongo (DRK). Die minister se suster, wat tydens die voorval by die Suid-Afrikaanse ambassade in Burundi gewerk het, het glo die dokumente verskaf.

In ’n gedetailleerde verklaring Sondag het die minister bewerings van onreëlmatigheid ontken en haar betrokkenheid by die sending uiteengesit.

Die 20-jarige vrou, voorheen bekend as Mimi, woon tans by die minister en haar gesin en is ingeskryf by ’n Suid-Afrikaanse kollege.

Wege het tydens verskeie vakansies in Burundi in 2013 en 2014 bevriend geraak met haar kinders, het sy gesê.

Wege is verder gedwing om haar ouerhuis te verlaat om mishandeling deur haar pa vry te spring. Die Verenigde Nasies se vlugtelingagentskap, UNCHR, was bewus van Wege se situasie en het haar aanbeveel om na die DRK te vlug.

Mapisa-Nqakula het aan die ambassade in die DRK geskryf en gevra dat Wege bygestaan word omdat haar saak ’n “klassieke saak vir vlugtelingbystand en beskerming” was.

Die minister ontken dat Wege die land met ’n vervalste paspoort binnegekom of dat sy ’n reis georganiseer het om Wege te gaan haal. Aangesien sy op ’n “amptelike reis” was, het sy Wege in die DRK, op pad na ’n beraad van die Afrika-unie in Addis Ababa, Etiopië, gaan oplaai.

Wege is in haar sorg vrygelaat nadat sy vir 10 dae in die DRK aangehou is weens die vermoede dat sy vervalste reisdokumente gehad het.

“Om te verhoed dat sy gedeporteer word, het ek aangebied om haar saam met my te neem en haar by te staan om wettige reisdokumente te bekom,” het sy gesê.

Die minister beweer ook dat Wege wettiglik gereis het omdat sy ’n kopie van haar paspoort en ’n visum op ’n geheuestokkie gehad het, nadat haar pa haar paspoort gekonfiskeer het.

Die DA het in ’n verklaring gesê die minister het die Immigrasiewet verbreek en die party se woordvoerder oor verdediging, Kobus Marais, het gesê sy moet verantwoording doen vir haar optrede

Bron – Netwerk 24


 

Enjoyed this post? Share it!