Moordenaar van Danie Fourie se lyk gekry in polisiesel

Die 31-jarige verdagte wat Woensdagmiddag in hegtenis geneem is in verband met die moord op Danie (Kat) Fourie en aanval op sy vrou Marianna, is Donderdagoggend (16/11) dood in ‘n polisiesel in Kathu aangetref.

Volgens kapt. Sergio Kock, polisiewoordvoerder, word die omstandighede rondom die verdagte se dood ondersoek. Die verdagte sou Vrydag (17/11) in die hof verskyn het. Sy lyk is gevind waar dit in ‘n polisiesel gehang het.
Fourie se lyk is Woensdagoggend buite sy huis gekry waar dit met ’n waentjieklap bedek was.

Marianna is ontvoer en vasgebind in die egpaar se Isuzu-bakkie op die N14, naby Mothibistad, Kuruman, gekry. Sy is ernstig beseer en na die hospitaal op Kathu geneem. Marianna sou na ’n hospitaal in Kimberley oorgeplaas word.
Volgens Kock het die polisie ook ’n .38-rewolwer aan die verdagte gevind, wat na bewering aan die oorledene behoort het.

Die Fourie-egpaar het die verdagte sowat drie weke gelede in diens geneem as tuinwerker en hy het ook ander take vir hulle verrig.

Deur: Kalahari Bulletin


Enjoyed this post? Share it!