Moordenaars van 86jarige word na 2 jaar verhoor

Dié getuie, Joseph Kakoa, het een van die beskuldigdes glo later by ’n huis in Moloto herken toe die polisie hom daarheen geneem het.

John Ramatsutle Letswalo, Abraham Themba Motshweni en Justice Ndlovu staan in die hooggeregshof in Pretoria tereg op ses aanklagte: Een van moord op Groenewald; een van moord op een van hul vermeende makkers, Amon Bheki Mnisi; een van poging tot moord op Groenewald se vrou, Ralie (74); ’n aanklag van roof met verswarende omstandighede; die onwettige besit van ’n vuurwapen; en die onwettige besit van ammunisie.

 Groenewald het Charles Café uit sy motorhuis op hoewe 48 in Boschkop, oos van Pretoria, bedryf toe hy en sy vrou op 12 Mei 2014 aangeval is.

Volgens ballistiese getuienis het Groenewald en Mnisi, een van die vermeende rowers, tegelykertyd op mekaar geskiet.

Groenewald, wat in die bors getref is, se lyk is in die huis gekry.

Mnisi, wat gewond weggehardloop het, se lyk is sowat 150 m van die Groenewalds se huis in ’n voetpaadjie in die veld gekry.

Konst. Lesiba Mashishi, ondersoekbeampte, het Dinsdag getuig Mnisi se identiteitsdokument is op die toneel gekry.

Hy het later gehoor Mnisi was ’n polisiereservis in KwaMhlanga.

Hy het getuig ’n swart binneskede vir ’n vuurwapen, dié wat gewoonlik deur speurders gedra word, is by die lyk gekry. Mnisi se vuurwapen is nooit gevind nie.

In Groenewald se huis is dié se rewolwer gekry.

Mashishi het getuig ’n taakspan het die beskuldigdes in die nag in Julie 2014 gearresteer. Die taakspan het Kakoa saamgeneem toe hulle die arrestasies gedoen het.

Volgens Mashishi het Kakoa die dag van die aanval na Groenewald se winkel gestap. Hy het ’n skoot gehoor en “twee swart mans” by die winkel sien uithardloop.

Die een man het die ander een gedra toe hulle verby hom kom. Toe Kakoa omkyk, het hy gesien die man wat gedra is, is in die voetpaadjie agtergelaat. Die ander man het weggehardloop.

Die polisie is na Letswalo se huis in Moloto. Kakoa het Letswalo hier herken as die man wat weggehardloop het.

Letswalo het ’n pienk Nokia-foon aan die polisie oorhandig. Mnisi se broer het dié foon later as Mnisi s’n uitgeken, het die ondersoekbeampte getuig.

Die polisie het die foon geneem sodat inligting daarvan afgelaai kan word.

Die verdediging het gevra dat Mashishi die foon Woensdag hof toe bring.

Die staat beweer in sy klagstaat die beskuldigdes het Ralie Groenewald probeer vermoor deur haar op die vloer neer te gooi, op haar te sit en haar te wurg.

Bron:Netwerk24


 

Enjoyed this post? Share it!