Motorwasser ry Ma en ongebore baba dood

Artikel 1

Motorwasser afgedank ná hy oor swanger vrou ry
  Die motorwasser wat ’n hoogswanger Belinda Louw by ’n motorwassery in die Pretoriase Moot omgery het, is afgedank.

Eduan Ras, bestuurder van die Sasol-vulstasie op die hoek van Johan Heynsrylaan en Ben Swartstraat in Gezina, sê die motorwasser is Dinsdagoggend summier afgedank nadat hy Maandag voor ’n tugverhoor verskyn het.

Media Labour, konsultante in arbeidsbemiddeling, het die saak hanteer.

Louw was 38 weke swanger met haar eersteling toe die motorwasser op 13 Augustus by dié Sasol-vulstasie oor haar gery het terwyl sy gewag het dat haar motor gewas moet word.

Haar ongebore seun, wat sy Ryan sou noem, is ná die ongeluk dood.

Sy het Sondagaand in die Muelmed-hospitaal aan haar beserings beswyk.

Louw het veelvuldige interne beserings en breuke opgedoen en was sedert sy in die hospitaal opgeneem is onder verdowing.

Alex Anderson, woordvoerder van Sasol, het verlede week gesê Louw was omstreeks 09:30 in die waggebied by die Sasol-vulstasie terwyl haar motor gewas is.

Die motorwasser wou ’n Toyota Fortuner, wat klaar gewas was, na die gebied neem waar voertuie gestofsuig en gepoleer word sodat haar motor gewas kon word.

“Die werker, wat nie ’n mandaat gehad het om ’n klant se voertuig te skuif nie, het sonder magtiging en strydig met die franchise se beleid besluit om die Fortuner van die wassery na dié gebied te bestuur.”

Volgens Anderson het die motorwasser beheer oor die voertuig verloor, by die waggebied ingery en bo-oor Louw gery.

Bron: Netwerk24

Artikel 2

Belinda, klein Ryan saam ter ruste gelê

Belinda Louw is Donderdagoggend saam met haar klein Ryan in haar arms begrawe.

Op die wit kis met drie ruikers van ligpienk en pers blomme was daar ’n paar denimskoentjies met wit sterretjies op.

Daar was nog ’n ruiker spesiaal vir Ryan, wat bestaan het uit fyn, wit blommetjies en ’n blou teddiebeertjie.

Louw is dood agt dae nadat ‘n karwasser met ‘n kar oor haar gery het terwyl sy gewag het dat haar eie motor klaar gewas word. Sy was 38 weke swanger met haar eersteling wat sy en haar verloofde, Corné Hitge, Ryan genoem het. Die voorval was op 13 Augustus by die Sasol-vulstasie op die hoek van Johan Heynsrylaan en Ben Swartstraat in Gezina.

Op die begrafnis het al haar geliefdes en vriende met briefies van haar afskeid geneem. Dié briefies was in haar en Ryan se begrafnisboekie. Daar was baie foto’s in die boekie, ook van Ryan.

Hitge, haar verloofde, het geskryf:

“Aan my skapie,

“Woorde kan nie beskryf hoe lief ek jou het en hoe baie ek jou gaan mis nie! Die voetspore wat jy in my lewe gelos het, sal vir altyd bly.

“Jy was my motivering en dryfkrag. Dankie dat jy my die geleentheid gegee het om iemand met ’n goeie hart te ken. Ek sal jou liefhê tot in ewigheid.”

Alet Ferreira, haar niggie, het geskryf dat ZZ2 tamaties nou minder wins gaan maak, omdat sy nie meer hier is om tamaties te koop nie.

“My kosbare niggie, hoeveel tamaties het ons nie saam geëet nie. Op my troue, in die koue, in die son, in jou kar, my kar, op die trein, net waar ons kon.”

NIEMAND GAAN STRY OF HY SY OUPA OF SY OOM SE ORE HET EN OF SY HANDJIES NET SOOS SY MAMMA S’N LYK NIE.

Belinda en Alet was vir ’n jaar lank saam in Londen.

“Ek was so bevoorreg om jou vir ’n jaar vir myself te hê in Londen. As ek sê vir myself, is ek eintlik verkeerd, jy het die oomblik wat jy daar by Heathrow geland het al die mense se harte gesteel. Daar is nie een persoon daar wat nie vir jou liefgehad het nie.”

Haar broer, Xander, het hul ouer suster, Elaine, en hul ma, Hester, se briefies in die NG kerk Wonderboom-Suid in die Pretoriase Moot voorgelees.

Hyself het nie ’n briefie geskryf nie, maar gepraat.

“Belinda was ’n vrolike mens. Almal hier vandag is haar vriende. Ons is ’n klein familie. Sy het vriende bymekaar gebring. Sy het mense met haar opgeruimde geaardheid geïnspireer.”

Van haar kollegas van Dischem in die Kolonnadesentrum het ook die begrafnis bygewoon. Sy het agt dae ná Ryan aan haar beserings beswyk.

Hy sou ’n week ná die ongeluk met ’n keisersnee gebore word.

Op die agterste blad van die begrafnisbrief is daar ook van hom afskeid geneem. Daar is ’n foto van hom met ’n mussie op.

“Hierdie volmaakte lyfie gaan nie huis toe saam met sy pappa en mamma wat senuagtig vir die hoeveelste maal seker maak die babastoeltjie is veilig vasgegespe nie.

“Oupas en oumas en ooms en tannies gaan nie nuuskierig wag dat hulle deur die voordeur loop by sy huis nie.

“Sy mamma gaan hom nie versigtig uit sy stoeltjie tel, hom warm toedraai in ’n kokonnetjie en senuagtig-stadig neerlê in sy splinternuwe wiegie nie.

“Sy pasgebore, nuwe lyfie gaan nie die eerste keer gewas word deur oorversigtige onbeholpe ouers nie.

“Hulle gaan nie elke twee ure wakker gemaak word omdat hy honger is sodat hulle naderhand wil omval van moegheid nie.

“Niemand gaan stry of hy sy oupa of sy oom se ore het en of sy handjies net soos sy mamma s’n lyk nie.

“Geen foto’s gaan geneem word van sy doop, sy eerste verjaardag, sy eerste skooldag, sy matriekafskeid, sy 21ste verjaardag, sy troue nie.

“Ons gaan alles van jou mis, liefste Ryantjie.

“Maar ons weet ’n donkerkopseuntjie huppel in die hemel.

“Met vreugde wat uit sy gesiggie straal en ogies wat blink, want hy was nou net op Jesus se skoot.”

Ds. Jackie Dippenaar het gebid dat Louw se familie en vriende God deur die trane en hartseer sal raaksien.

Bron: Netwerk24


 

Enjoyed this post? Share it!