Munisipale bestuurder in Suid-Vrystaat kry verlof na hy eie salaris verhoog met R300 000

Nadat die munisipale bestuurder van die Xhariep-distriksmunisipaliteit in die Suid-Vrystaat homself beloon het met ‘n ekstra R300 000 bo en behalwe sy maand se salaris, is hy beloon met spesiale verlof, hangende ‘n ondersoek daarna.

Dit het gebeur ten spyte daarvan dat die munisipaliteit te finansies reeds in ‘n ellendige toestand verkeer.

Mnr. Wouter Wessels, VF Plus-LPW, reken dit is absoluut onaanvaarbaar dat die munisipale bestuurder slegs op spesiale verlof geplaas is en nie geskors is hangende ‘n dissiplinêre verhoor nie. “Die tekort aan gevolge vir oortredings is die oorsaak vir die wanfunksionaliteit van die distriksmunisipaliteit,” sê hy.

“Ongemagtigde, onreëlmatige en vrugtelose en verkwiste uitgawes word nie ondersoek nie en geen amptenaar word hiervoor aanspreeklik gehou nie.

“Een van die belangrikste komitees van ʼn munisipaliteit is die munisipale openbare rekeninge-komitee. Dit is ʼn skande dat hierdie munisipaliteit se openbare rekeninge-komitee nog nie eers funksioneel is nie en nog geen vergaderings sedert Augustus 2016 gehou het nie.

“Die ANC se onderrok hang uit. Hulle onvermoë, kaderontplooiing, gierigheid en selfdienende neigings is besig om hulle in te haal en dit sal in chaos vir die regerende party eindig,” sê mnr. Wessels.

Bron: Die Vryburger


 

Enjoyed this post? Share it!