’n Beroep word gedoen om rassekonfliksituasies ten alle koste te probeer vermy om inkriminasie te voorkom

Ons het voorheen gewaarsku dat enige wit-swart geweld met ongekende bevooroordeling die blanke sal inkrimineer. Die onderstaande berig dien weereens as bevestiging hiervan.

Ongeag van die oorweldigende bewyse wat in hierdie aanval op die blanke familie voorkom, word die man steeds aangekla van moord en poging tot moord.

By navraag by ons regsadviseurs, het ons bevestig dat die polisie deesdae hierdie optrede volg, ongeag van die wete dat daar groot eise teen die polisie ingestel sal word vir onwederegtelike arrestasie.

Daar word ‘n beroep op die publiek gedoen om asseblief alle rassekonfliksituasies ten alle kostes te vermy.

Pa van moord aangekla ná hy rower doodskiet

’n Pa van Leeudoringstad in Noordwes het Vrydagnag ’n gewapende rower gewond en sy makker doodgeskiet in ’n verbete geveg toe ’n gewapende bende hom en sy gesin in hul huis aangeval het. Chris Holtzhausen (44) word nou van poging tot moord en moord aangekla.

“Dit was ’n absolute stryd om oorlewing. Ek het geweet as hulle my oorrompel, gaan hulle my doodmaak en my vrou en kinders verkrag – ek moes hulle beskerm.”

Holtzhausen is erg aangerand in die aanval en het selfs van sy toonnaels verloor. Sy vrou, Elize, is met ’n koevoet oor haar lyf geslaan. Die egpaar moet al twee antiretrovirale middels gebruik nadat hulle vir MIV-toetse gegaan het.

“My oudste dogtertjie (9) is ’n held. Toe die eerste skoot klap, het sy haar sussie (3) gegryp, hulle in ’n kombers toegerol en onder ’n bed weggekruip.”

Holtzhausen se ma, Bets (68), is Vrydag begrawe nadat sy aan ’n hartaanval dood is. Van haar familie, Hennie Bear (71) en sy vrou, Vicky (78), het ná die begrafnis by die Holtzhausens oorgebly.

“Ons het wakker geskrik toe ons yorkshire-terriër, wat op die bed slaap, geknor het. Toe is die inbrekers reeds in die huis,” sê Holtzhausen.

Holtzhausen het later gesien die palissade om die huis is gebreek en ’n skuifdeur is van die spoor af getel. Die inbrekers het klapmusse opgehad en Holtzhausen met ’n koevoet op sy regterarm geslaan. Hulle het vir geld gevra. “Ons het gesê daar is nie geld in die huis nie.”

Bear het wakker geword van die geraas en is ook deur van die aanvallers getakel.

“Ek is oor my knieë en op my voete geslaan. Twee van my toonnaels moes verwyder word,” sê Holtzhausen.

Elize het beserings aan haar linkerarm, knieë en oor haar boude en bobene opgedoen soos sy geslaan is. Sy het ’n klapmus van een van die mans se gesig afgetrek.

Een van die man se makkers het in Afrikaans vir Elize gesê: “Los hom, ek gaan jou met ’n mes steek.”
Bear was ook in ’n verbete stryd gewikkel met van die rowers wat ’n pistool teen sy kop gedruk het.

Terwyl Elize, Bear en Vicky aangerand is het die ander mans die huis geplunder. Van Vicky se vingers is gebreek toe sy probeer terugveg het. Holtzhausen kon in die harwar losruk en het sy pistool uit ’n kluis gaan haal. Hy het in die sitkamer twee skote geskiet.

“Ek kan nie beskryf hoe erg dit was nie, maar ek moes dit uit selfverdediging doen.”

Die vier ander inbrekers het gevlug. Die polisie het op ’n rugsak afgekom waarin gesteelde selfone, beursies, iPads en die twee kinders se horlosies was.

Holtzhausen sê sy oudste dogter is erg getraumatiseerd en weier om terug te gaan na die huis toe.

“Ons is getraumatiseerd deur my ma se dood en bo-op dit gebeur die huisrooftog toe.”

Die gesin sal berading kry.
Die polisie in Noordwes soek na die vier rowers wat gevlug het.

Skrywer: Marietie Louw-Carstens


 

Enjoyed this post? Share it!