Nene: R100 miljard se pensioen verdwyn in 48 uur

Jacob-Zuma-digitlab-320x240Nene: R100 miljard se pensioen verdwyn in 48 uur

Dié astronomiese verliese het Dinsdag aan die lig gekom nadat die Openbare Beleggingskorporasie (OBK) dit tydens die korporasie se verskyning voor die parlementêre staande komitee oor finansies erken het.

Die OBK belê hoofsaaklik die pensioengeld van staatswerkers (deur die GEPF) en het ’n beleggingsportefeulje van sowat R1 800 miljard onder sy bestuur.

Dr. Daniel Matjila, uitvoerende hoof van die OBK, het die onthulling gemaak nadat David Maynier, die DA se parlementêre woordvoerder oor finansies, die vraag oor die impak van Nene se afdanking op 9 Desember verlede jaar op die OBK se beleggingsbates aan hom en Mcebisi Jonas, adjunkminister van finansies en voorsitter van die OBK-raad, in die komitee gevra het.

ANC-LP’s, insluitend Sifisio Buthelezi, in die komitee het egter nie op hulle laat wag nie en het Matjila onmiddellik laat verduidelik dat die verliese baie kort daarna herstel is.

Maynier het ná die onthulling gesê die verliese wat die OBK gely het, “is ’n skerp herinnering van hoeveel skade aan pensioenarisse se spaargeld aanrig is en ’n bewys dat pres. Jacob Zuma geheel en al verkeerd was toe hy beweer het dat die effek van sy rampspoedige besluite in Suid-Afrika oordryf was.”

Jonas, wat tydens die sitting Dinsdag reg langs Matjila gesit het, het onlangs ook ’n groot opskudding veroorsaak toe hy onthul het dat die omstrede Gupta-gesin hom die pos van minister van finansies aangebied het om in Desember by Nene oor te neem. Hy het dit van die hand gewys.

Pravin Gordhan, die huidige minister van finansies, is enkele dae nadat Zuma vir Des van Rooyen, huidige minister van samewerkende regering en tradisionele sake, in Nene se plek aangestel het, in dié pos aangestel nadat die rand getuimel en markte erg negatief op die aanstelling gereageer het.

Biznews bereken dat die land in daardie noodlottige tydperk R506 miljard op die aandele- en effektebeurs verloor het, waarvan minstens R290 miljard op die JSE was.

Van dié verliese is intussen herstel.

Matjila het die verliese opgebreek en gesê dat net die GEPF alleen in die twee dae sowat R95 miljard verloor het.

Daarby het die Werkloosheidversekeringsfonds (WVF) volgens Matjila ’n verlies van R7 miljard gely, terwyl nog ander beleggingsbates gesamentlike verliese van sowat R4,3 miljard gely het.

Yunus Carrim, voorsitter van die staande komitee oor finansies, wou ook Dinsdag by Matjila weet of die bedrag “die totale geld is wat ons in 48 uur verloor het” en of alles weer herwin is.

Matjila het hierop gesê dit het “aansienlik herstel”.

Op navraag het Matjila bevestig dat die OBK op 9 en 10 Desember 2015 R100 miljard verloor het, maar dat die verliese “ten volle teen einde Desember 2015 herstel is”.

* Matjila het ook aan die komitee gesê dat die OBK geen beleggings het in enige van die maatskappye van die omstrede Gupta-gesin nie. – Netwerk24

Enjoyed this post? Share it!