Nog ’n boer vermoor

Sy dogter het probeer om hom van die aanvallers weg te ruk maar hy is in die kop geskiet.

 ‘n Bejaarde boer, mnr. Friedel Filter is Vrydag 13 Mei op sy plaas Frischgewagt naby Paul Pietersburg in KZN deur vier gewapende aanvallers doodgeskiet.

Sy vrou Brigitte wat bedleênd is ná onlangse rugoperasie en ’n dogter wat op die plaas gekuier het is erg getraumatiseer maar andersins ongedeerd.

’n Familielid op Ermelo, mnr. Edgar Filter het gesê vier gewapende verdagtes het die huis binnegegaan en mnr. Filter aangehou.

Sy dogter het probeer om hom van die aanvallers weg te ruk maar hy is in die kop geskiet.

Dit is nie bekend wat in die aanval buitgemaak is nie.

Volgens mnr Henry Geldenhuys, voorsitter Veiligheid TLU SA het die aanvallers in die Filters se Isuzu bakkie van die toneel af gevlug.

Die bakkie is naby die plaas agtergelaat en die verdagtes is te voet na ’n nabygeleë informele nedersetting waar nog ’n man na bewering geskiet en gewond is.

Mnr. Filter was alombekend as ’n begaafde trompetblaser en het onlangs ’n toekenning ontvang vir 65 jaar diens as trompetblaser in die Braunschwieg Kerk . Hy was ook koorleier in dié kerk.

Die ondersoek duur voort.

Bron: Highvelder


 

Enjoyed this post? Share it!