Nog ‘n sinnelose moord na aanval op plaas in Wes-Kaap

Enkele ure nadat ʼn bejaarde man Vrydagaand op ʼn plaas buite Potchefstroom in Noordwes met ʼn haelgeweer doodgeskiet is, is nog ʼn man op ʼn plaas in die Wes-Kaap vermoor toe hy sy gesin wou beskerm.

Kapt. FC van Wyk, polisiewoordvoerder van die Wes-Kaap, het Sondag aan Maroela Media gesê die man is Saterdag teen 00:20 in sy plaashuis naby Philadelphia, noordoos van Melkbosstrand, oorval.

“Volgens berigte vanaf die toneel het vier verdagtes met klapmusse aan die man se huis binnegestorm terwyl die huiseienaars gekuier het. Die slagoffer het hulle genader, waarna hy geskiet is,” het Van Wyk gesê. Die aanvallers het daarna te voet van die toneel gevlug.

Die man is na ʼn hospitaal geneem waar hy later aan sy beserings beswyk het. Die polisie ondersoek ʼn saak van moord. Die motief vir die aanval word ondersoek.

Die slagoffer is glo pa van twee dogtertjies en het gesterf toe hy hulle wou beskerm. Sy ouderdom was nie dadelik beskikbaar nie.

Die voorval volg nadat ʼn 69-jarige man Vrydagaand op ʼn plaas in die Vyfhoek-omgewing buite Potchefstroom doodgeskiet is.

Lt.kol. Pelonomi Makau, provinsiale polisiewoordvoerder van Noordwes, het vroeër aan Maroela Media gesê die voorval het omstreeks 22:30 plaasgevind.

“Die man en sy seun het gaan ondersoek instel toe die alarm afgegaan het. Hulle is na buite waar hulle drie verdagtes by die heining gesien het,” het Makau gesê.

ʼn Stoeiery het glo ontstaan en een van die aanvallers het die man met ʼn haelgeweer van ʼn kort afstand af in die bors geskiet. Sy seun het die aanvallers teengestaan en van die haelgeweer en ʼn mes ontwapen. Die verdagtes het ook ʼn selfoon laat val voor hulle te voet van die toneel gevlug het.

Russel Meiring, woordvoerder van ER24, het gesê die man se liggaam is buite die erf aangetref. “Hy is ondersoek en het geen tekens van lewe getoon nie. Daar kon ongelukkig niks vir hom gedoen word nie en hy is op die toneel dood verklaar.”

Niemand is nog in verband met die voorval in hegtenis geneem nie. Die polisie ondersoek ʼn saak van moord.

Deur: Maroela Media


Enjoyed this post? Share it!