Nog ‘n Wolf wat dalk skaapwagter gemaak kan word?

Oud-bankrower op ANC-kieslys

Die omstrede insluiting van ‘n voormalige bankrower op die ANC se benoemingslys as ‘n raadslid vir Oos-Londen in die Oos-Kaap het blykbaar wenkbroue laat lig, al voer hy aan dat hy ‘n skoon blaadjie omgeslaan het.

Dat dit enigsins ‘n beroering veroorsaak, is raar aangesien ’n geskiedenis van hoe bepaalde ANC-raadslede hulle in hul ampte ten opsigte van munisipaliteite se geldsake ‘wangedra’ het deur ouditverslae sedert 1994 vertel word.

Mkhuseli “Gidla” Nombewu is boonop sommer heel hoog op die regerende party se benoemingslys van proporsionele kandidate vir die stadsraadslede in die komende munisipale verkiesing. Hy is nommer vier op ‘n lys waarop 45 name verskyn.

Volgens hom het hy betaal vir sy misdaad en het in 2011 presidensiële kwytskelding daarvoor gekry.

Nombewu wat ‘n voormalige lid van Umkhonto weSizwe is, voer aan sy misdaad is deur politiek gemotiveer en dit is die voormalige sekretaris-generaal van die SAKP, Chris Hani, wat hom en sy ‘kamerade’ opdrag gegee het om die rooftog uit te voer.

Ondanks sy dramatiese vertelling hieromtrent, is daar ANC-lede wat aanvoer dat hulle oorgesien is vir insluiting op die lyste in die guns van ongure karakters. Sommige het selfs Nombewu se insluiting as ‘n verleentheid vir die ANC beskryf.

Spanning het die afgelope tyd op verskeie plekke opgebou weens ontevredenheid oor die ANC se benoemingslyste, en het in Durban op geweld uitgeloop.

Bron: Vryburger


Enjoyed this post? Share it!