NVG na grondwethof oor Jacob Z­uma korrupsieklagte

 

Kaapstad. – Die nasionale vervolgingsgesag het nou die hoogste hof in die land genader om direk aansoek om verlof tot appèl te doen teen ’n vorige hofbeslissing oor pres. Jacob Zuma se korrupsieklagte.

Dit terwyl die president Donderdag in antwoord op ’n skriftelike parlementêre vraag oor sy saak gesê het hy oorweeg nog sy opsies.

Pres. Zuma se aansoek om verlof tot appèl is vroeër in die appèlhof geweier.

Maar die NVG het nou die konstitusionele hof genader.

Gosiame Seleka van die kantoor van die staatsprokureur sê in die beëdigde verklaring die NVG het sy opsies heroorweeg in die lig van die uitkoms van Zuma se appèl. Seleka sê ook adv. Shaun Abrahams, die nasionale direkteur van openbare vervolging (NDOV), is tans in die buiteland.

Volgens Seleka is die saak van “groot grondwetlike belang omdat dit gaan oor die magte van die NVG en die NDOV”.

“Dit is ’n saak wat bots met belangrike grondwetlike vrae wat in die openbare belang is.”

Seleka verwys na die hooggeregshofbeslissing waarin bevind is die destydse hoof van die NVG se besluit om die 783 korrupsieklagte teen Zuma te laat vaar, was irrasioneel en dat die klagte teen die president hervat word.

Seleka voer aan die destydse NDOV het die diskresie gehad om die klagte te laat vaar omdat prosesse misbruik is in wat bestempel word as die “komplot” teen Zuma.

Maar James Selfe, DA-LP, het in ’n verklaring dié aansoek afgemaak as net ’n voortgesette “misbruik van die regstelsel en belastingbetalers se geld”.

“Dit op sigself bevestig net weer die DA se standpunt dat die besluit om die klagte te laat vaar, polities was en nie as gevolg van prosesse nie.” Volgens Selfe is dit tyd vir die korrupsiesaak teen Zuma om te begin.

Bron: Netwerk24


 

Enjoyed this post? Share it!