“Ons” Maak ‘n Las en Nico Nel verdwyn

Maak ’n las-man ‘is vort met ons geld’
‘Dis nie ’n grap Nico Nel’, sê skuldeisers wat hom soek

Selfs ’n familielid is op sy spoor, verneemRapport, maar dié grapjas was vort uit Ceres waar hy tot onlangs gewoon het.

Nel is bekend vir sy optrede in TV-geselsprogramme soos Spies en Plessie enMaak ’n las. Hy was ook onder sy eie naam ’n private finansiële adviseur tot 2012 en vir Old Mutual tot verlede jaar.

 In die jongste wending het Old Mutual ’n ondersoek begin en ’n jare lange vriend van Nel het Vrydag sy prokureur opdrag gegee om hom te dagvaar.

Jaco van der Merwe, uitvoerende hoofbestuurder van Old Mu­tual Personal Financial Advice, sê hulle het ’n ondersoek begin nadat ’n familielid van Nel hulle verlede maand genader het.

“Ons het onmiddellik ’n deeglike ondersoek begin om die saak te beoordeel en vas te stel of dit ’n persoonlike familiesaak of Old Mutual se verantwoordelikheid is.

“Indien daar vasgestel word dat kliënte skade gely het weens mnr. Nel se optrede in die loop en binne die bestek van sy mandaat met Old Mutual, sal ons onsself verantwoordelik hou en daardie kliënte vergoed.”

Hy sê Nel is in 2012 by hulle aangestel. “Hy was ’n bekende openbare persoonlikheid met ’n wye netwerk van vriende en kennisse, en hy was gewild by sy
kliënte,” sê Van der Merwe.

Die gewildheid het duidelik getaan as ’n mens na Nel se vriend luister.

HY WAS ’N BEKENDE MET ’N WYE NETWERK VAN VRIENDE.
Jaco v.d. Merwe

Sy 76-jarige vriend van Hermanus sit ’n geruime tyd letterlik met sy hande in sy grys en yl wordende hare. Hy verkies dat sy naam nie gepubliseer word nie, aangesien sy geldelike posisie vir hom ’n “groot persoonlike verleentheid” is.

Hy vertel hy het oor die jare heen R650 000 aan Nel geleen. Nel het die lening aanvanklik fluks én met goeie rente terugbetaal. Toe droog alles op.

“Nico het altyd gespog oor bekende skat­ryk sakemanne waarmee hy bekend is. Hoe kon jy hom dan nie glo nie,” sê die man.

“Dis absoluut skokkend dat iemand in wie jy jou vertroue gestel het jou so in die steek laat.”

Sy gesondheid gaan agteruit oor dié stres.

“ ’n Mens sou verwag dat Nico darem die ordentlikheid sal hê om jou terug te bel. Hy vlieg die hele land vol en hou manne-aande vir rugbymense en boere.”

Die man sê hy het Nel persoonlik op sy plaas Blouberg, tussen Ceres en Prince Alfred Hamlet, gaan opsoek, maar dié was skoonveld, sy briewebus oorlopens toe vol.

“Op pad terug kom Nico in sy bakkie aangery. Ek flikker toe ligte en ry voor hom in. Hy móés stop.”

Die man sê Nel het hope beloftes gemaak.

Trevor Ernstzen, ’n afgetrede boer van die Paarl, is ook op Nel se spoor.

Ernstzen het R300 000 vir ’n 20%-aandeel in Nel se Karoo-slaghuis in Ceres betaal en later nog ’n ekstra R50 000 “as ’n direkteurslening”, sê sy vrou, Joan.

Hulle het agterna uitgevind dat slegs Phoebe (Nel se vrou) en Johan Herselman se name op die aandeelhouerlys is.

“Nico het net nooit op ons oproepe en teksboodskappe gereageer nie,” sê sy.

David Wesson, eienaar van ’n motorbandonderneming in Ceres, sê Nel skuld hom nog ’n “redelike agterstallige” rekening en “is nou net missing”.

“Ons het briewe geskryf, maar kry hom nêrens.”

Die afgelope Vrydag het Christie Viviers, ’n Bolandse prokureur, in opdrag van die 76-jarige vriend Nel opgespoor by ’n woonstelkompleks in Bellville.

Toe Rapport gister by die woonstel opdaag, het Nel in ’n kamerjapon die deur oopgemaak. Agter hom het die reuk van koffie en tandepasta vermeng in die lug gehang.

’n Gemoedelike Nel het gesê hy gaan nie oor die bewerings in die media praat nie en sien tans ’n prokureur.

“Kom volgende week, dan gee ek julle ’n lekker storie,” is al wat hy wou sê.

Viviers is intussen opdrag gegee om Nel te dagvaar.

Maar die tou skuldeisers is lank, het Rapport vasgestel.

Hofverslae toon die Stad Kaapstad het al in 2014 vonnis teen hom verkry weens agterstallige geld van R11 365.

’n Maatskappy genaamd Debtcor het in dieselfde jaar ook vonnis teen hom verkry vir die bedrag van R22 927.

Verslae by die aktekantoor wys hy besit darem nog ’n plaas in die Witzenberg-distrik en ’n meenthuis in die Kaap.

Bron: Rapport


 

Enjoyed this post? Share it!