Ontleding: Week se 3 belangrikste politieke stories

ANC-vlaggie-275x275 (1)Die afgelope week het verwikkelinge op die politieke front opgelewer waarvan die gevolge nog vir ’n hele tydjie gaan uitkring.

1. Opposisiepartye span saam teen ANC

Woensdagmiddag sit Julius Malema, EFF-leier, agter ’n tafel saam met ander EFF-leiers op ’n oopte in die Johannesburgse township Alexandra en kondig aan sy party gaan vir die DA – “die mindere duiwel” – se burgemeesterskandidate in die bestrede metro’s stem, asook vir dié van die IVP in KwaZulu-Natal.

Twee en ’n half uur later, ’n paar kilometer verder, in ’n Sandtonse hotel se konferensiekamer, sit Mmusi Maimane, DA-leier, agter ’n tafel saam met ander opposisieleiers en kondig aan dat die DA ’n samewerkingsooreenkoms met Cope, die UDM, VF Plus, IVP en ACDP aangegaan het.

Teen Vrydagmiddag het onder meer Nelson Mandelabaai, Kouga en Tshwane vir die eerste keer DA-burgemeesters gehad.

* Hoekom is dit belangrik?

Dit is ’n herskikking in die Suid-Afrikaanse politiek: Die ANC se hegemonie (buite die Wes-Kaap) is ontwrig en hy moet nou leer hoe om ’n opposisie te wees. Die DA kry nou meer geleenthede om hom as ’n alternatiewe regering te bewys, terwyl die EFF invloed kan uitoefen oor byvoorbeeld begrotings sonder om self die harde regeerwerk te doen.

Terwyl die samewerking ’n groter konsensusgedrewe benadering onder die opposisiepartye gaan aanmoedig, wat demokratiese prosesse behoort te versterk, kan dit ook tot groot onstabiliteit in rade lei as die onderlinge verhoudings versuur.2. SA nader aan ’n nuwe OB

En nou is daar vyf: regters Sharise Weiner, Siraj Desai en advv. Busisiwe Mkhwebane, Muvhango Lukhaimane en prof. Bongani Majola het die kortlys gehaal om as Suid-Afrika se nuwe openbare beskermer (OB) aangewys te word, terwyl Kaajal Ramjathan-Keogh, prof. Narnia Bohler-Muller, Willie Hofmeyr, adv. Kevin Malunga, adv. Jill Oliphant, adv. Madibeng Mokoditwa, adv. Mhlaliseni Mthembu, adv. Mamiki Goodman en adv. Nonkosi Cetywayo nie die kortlys kon haal nie.

’n Ad hoc-komitee van die parlement sal volgende week besluit wie hy as adv. Thuli Madonsela se opvolger by pres. Jacob Zuma aanbeveel.

* Hoekom is dit belangrik?

In haar termyn, wat in Oktober verstryk, het Madonsela gewys watter belangrike rol die OB kan speel om korrupsie – selfs in die hoogste gestoeltes – te beveg. Die OB word vir ’n termyn van sewe jaar aangestel en dié persoon kan nie goedsmoeds vervang word nie. Dit is dus noodsaaklik dat die mees geskikte persoon aangestel word.3. ANC stem in tot ondersoek na SABC

Die ANC het Dinsdag die ongewone stap gedoen om met die DA in die portefeuljekomitee oor kommunikasie saam te stem dat ’n parlementêre ondersoek na die SABC gedoen moet word. Voorheen het die ANC in dié komitee vir Faith Muthambi, minister van kommunikasie, en Hlaudi Motsoeneng, die omstrede SABc-bedryfshoof, geskerm.

* Hoekom is dit belangrik?

Behalwe dat die SABC ’n grondwetlike plig het om ’n openbare uitsaaier te wees, is dit ook die grootste nuusbron in die land. ’n Behoorlike, deurtastende ondersoek na die talle en veelbesproke probleme by die uitsaaier die afgelope tyd kan ’n goeie begin wees vir die instelling om weer sy werk behoorlik te doen

Bron: Netwek24 –Deur Jan Gerber


 

Enjoyed this post? Share it!