Oos-Kaapse boer trompop doodgeskiet

Dit lyk asof roof hoegenaamd nie die motief vir die moord op die Oos-Kaapse boer, Brent Gibbons op sy plaas in die Steynsburg-omgewing was nie, maar dit lyk eerder na ‘n “beplande moord”.

Hierdie mening is uitgespreek deur die president van AgriSA in die Oos-Kaap, Douglas Stern, in reaksie op die moord van die 45-jarige Gibbons.

Sy vrou, Willemien (43 jaar), is ook geskiet en verkeer in ‘n ernstige, maar stabiele toestand in ‘n hospitaal in Port Elizabeth.

Willemien het aan die polisie vertel haar man was op pad om ‘n waterpomp te gaan afskakel en was net buite die huis toe die aanvaller toegeslaan het. Hy het verskeie skote op Gibbons afgevuur en toe sy naderstorm om die kyk wat aangaan, is sy ook geskiet.

Sy het langs haar man inmekaar gestort, en hulle aanvaller het ontvlug. Sy kon egter later by ‘n tweerigting radio uitkom en het hulp ontbied. Sy het ‘n buurman verwittig en hy het die polisie geskakel, waarna hulle onmiddellik na die plaas, Fonteintjie toe is.

Hulle drie jong kinders het voor die televisie gesit toe die aanval plaasgevind het.

Op hierdie stadium is dit nie bekend hoeveel aanvallers op plaas was nie. Niks is klaarblyklik tydens die aanval geroof nie.

‘n Saak van moord en poging tot moord word ondersoek.

Niemand is nog in verband met die aanval in hegtenis geneem nie.

Bron: Vryburger


Enjoyed this post? Share it!