Openbare Beskermer onderstreep haar onkundigheid deur hofaksie teen haar bevindings en aanbevelings oor Absa teen te staan

Die Openbare Beskermer (OB), adv. Busisiwe Mkhwebane se besluit om die hofaksie teen te staan wat die Reserwebank en Malusi Gigaba, minister van finansies, ingestel het teen haar bevindings en aanbevelings oor Absa, is irrasioneel en onderstreep haar onkundigheid en onbevoegdheid, sê adv. Anton Alberts, voorsitter van die VF Plus.

Adv. Alberts sê dit is duidelik dat die OB heeltemal uit haar diepte is en dat sy oënskynlik nie die boodskap gekry het dat sy buite haar mandaat opgetree het met haar aanbevelings nie.

Hy sê sy speel nou met woorde deur te sê dat sy “misverstaan” is.

“Haar opmerking in die verslag oor die rol van die Reserwebank was totaal buite orde aangesien dit ʼn saak is wat deur die parlement aangevoer moet word aangesien dit ʼn grondwetlike wysiging sou verg.

“Haar bevinding kan net ongedaan gemaak word deur die hofaansoek wat die partye nou gebring het, en die feit dat sy dit teenstaan wys dat sy wil inmeng in die magte van die parlement en dat sy grondwetlike wysiginge vanuit haar kantoor teweeg wil bring wat nie haar rol is nie. Sy stel haar in die proses ook op teen minister Gigaba.

“Gemeet aan haar voorganger is die huidige OB besig om ʼn verleentheid te raak vir Suid-Afrika. Dit is ʼn skrikwekkende situasie gesien in die lig van die feit dat haar kantoor ʼn kritiek-belangrike rol speel om die mense van Suid-Afrika teen staatsvermorsing te beskerm.

“Dit is ironies dat sy nou eintlik doen wat sy veronderstel is om te keer, en dit is om die staat se geld te vermors op ʼn onnodige hofaksie. Dit is teleurstellend, en die vraag moet gevra word of sy enigsins geskik is vir dié belangrike pos,” sê adv. Alberts.

Bron: Vryheidsfront Plus


Enjoyed this post? Share it!