Paarl: Geboue, voertuie brand ná protes oor besetting

Paarl onluste

’n Protesoptrede oor grondbesetting het Maandagaand in Mbekweni naby die Paarl ’n gewelddadige nadraai gehad toe ontevrede inwoners verskeie winkels en huiswinkels geplunder en munisipale voertuie en geboue aan die brand gesteek het.

’n Groep mense het Vrydag ’n stuk grond (erf 557) langs Jan van Riebeeckrylaan probeer beset. Die polisie het die groep in sy spore gestop.

Nadat geweld uitgebreek het, het die Drakenstein-munisipaliteit Saterdagaand ’n interdik teen die besetters verkry om hulle van die grond weg te hou. Die grond is reeds vir die bou van woonhuise geoormerk.

Die interdik het nog geweld ontlok.

Volgens lt.kol. André Traut, polisiewoordvoerder, is twee mense ná Maandagaand se geweldpleging in hegtenis geneem.

“Ons ondersoek meer gevalle van openbare geweld, maar het reeds twee verdagtes wat met geplunderde goedere gevind is, aangekeer. Hulle sal volgende week in die hof verskyn.”

Volgens Mart-Marié Haasbroek, ’n woordvoerder van die munisipaliteit, is hulle besig om ’n volledige verslag saam te stel van wat in die protesoptrede beskadig is.

Nog ’n ligte vragmotor is Dinsdagoggend aan die brand gesteek.

“Ek kan ongelukkig nie ontken of bevestig dat van ons eiendom beskadig is nie.”

Volgens Traut is die polisie steeds in die gebied en word die protesoptrede gemonitor.

Kaapstad. – Die burgemeester van die Drakenstein-munisipaliteit het ’n beroep om kalmte gedoen nadat geweld met die besetting van grond in die Paarl uitgebreek het.

Geen onwettige besetting van munisipale grond of geweld sal toegelaat word nie, het Conrad Poole, die burgemeester, gister in ’n verklaring gesê.

Hy het volgehou dat geen beloftes aan die gemeenskap oor die gebruik van die grond gemaak is nie en versoek dat dokumentasie wat dit staaf na vore gebring word.

 Oor die naweek het toestande in Mbekweni gespanne gebly, waar mense Vrydag grond (erf 557) langs Jan van Riebeeck-rylaan probeer beset het en die polisie ontbied is.

’n Brandbestryder van die munisipaliteit is die naweek beseer toe hy met klippe bestook is, terwyl die lapa by die openbare swembad in Mbekweni afgebrand is.

Intussen het die munisipaliteit Saterdagaand ’n interdik teen die besetters verkry om hulle van die grond te weerhou wat vir behuising beskore is.

Poole het gister met verteenwoordigers van die besetters gepraat, maar kon nie ’n oplossing vind nie.– Malherbe Nienaber

Bron: Netwerk24


 

Enjoyed this post? Share it!