Palesa Sotjifa sê ekskuus oor rassisme op Twitter

Vrou sê ekskuus oor rassisme op Twitter

Dit kom nadat Sotjifa die afgelope naweek die onderwerp van talle gesprekke was oor die rassistiese stellings wat sy twee jaar gelede kwytgeraak het.

Sotjifa het getwiet: “Hulle moes hulle gestop het en almal doodgemaak het. Dan sou ons ’n land vry van wit mense hê.”

 Sy het verlede jaar in Junie op Twitter gevra “die EFF moet 500 wit mense vir ons doodmaak”.

Sotjifa sê haar twiets is uit verband geruk, veral omdat “iemand” die moeite gedoen het om dinge wat sy twee jaar gelede geskryf het weer uit te grawe.

Sotjifa meen @Clint_ZA het jare gelede geskille met haar gehad.

DAARDIE TWIETS WAS GEBORE UIT DIE FRUSTRASIE WAT BAIE SWART JONG MENSE VOEL.

Sy sê mense moet eers vra hoekom sy dit wat sy geskryf het, getwiet het.

“Ons het toegelaat dat Clint die walglikste dinge oor swart mense sê. Ek hou hom al amper ’n jaar lank dop.”

Volgens haar het iemand iets leliks aan haar gesê wat haar daarna gedryf het om te sê die EFF moet wit mense doodmaak.

In een van die twiets waar Sotjifa om verskoning vra, het sy aan die EFF jammer gesê.

“Ek sal graag om verskoning vra aan die EFF, Julius Malema, Mbuyiseni Ndlozi en Floyd Shivambu dat ek die EFF se naam in oneer gebring het,” lui die twiet. Verder sê Sotjifa sy is nie aan die party gekoppel nie.

In haar verduideliking sê Sotjifa sy moedig niemand aan om iemand anders dood te maak nie. “Daardie twiets was gebore uit die frustrasie wat baie swart jong mense voel.”

Sotjifa het haarself regverdig deur te sê: “Toe Trevor Noah sy internasionale werkie gekry het, is rassistiese twiets van hom uitgegrawe, maar almal het verstaan dat hy grootgeword het. Gee my ’n kans,” lui nog ’n twiet.

Sy sê sy kan nie gekruisig word oor twee jaar gelede se twiets nie.

Sotjifa het aan Beeld gesê sy gaan haar kant van die storie nie aan die media vertel nie. Sy sê die verskil tussen haar en Penny Sparrow is dat sy nie ’n rassis is nie.

Na verneem word, is ’n klag teen Sotjifa by die Menseregtekommissie (MRK) ingedien.

Gail Smith, woordvoerder van die MRK, het nie op navrae geantwoord nie.

Bron: Netwerk24


 

Enjoyed this post? Share it!