Pastitso( Griekse weergawe van lasagne)

Pastitso

Pastitso
Pastitso word beskryf as die Griekse weer¬gawe van die Italiaanse lasagne. Hierdie resep is ’n eenvoudige weergawe van die tipiese ¬gereg, wat bestaan uit macaroni, parmesaankaas en ’n spesery-vleisvulsel bedek met ’n ryk kaassous.

Pastitso
Lewer 4 – 6 porsies

Basis
200 g elmboog-macaroni
1 ekstragroot eier, liggies geklits
125 ml (½ k) gerasperde parmesaankaas
30 ml (2 e) olyfolie
500 g maer beesmaalvleis
1 medium ui, fyngekap
2 knoffelhuisies, gekneus
410 g-blik gekapte tamaties
80 ml droë witwyn
2,5 ml (½ t) fyn kaneel
sout en varsgemaalde swartpeper na smaak
Bolaag
50 g botter of margarien
80 ml koekmeelblom
500 ml (2 k) melk
125 ml (½ k) gerasperde parmesaankaas
15 ml (1 e) droë broodkrummels
gekapte vars origanum bo-op

Metode
1. Basis: Kook pasta tot sag. Dreineer, laat effens afkoel en voeg die geklitste eier en kaas by. Meng en druk in die bodem van ’n medium oondvaste bak.
2. Verhit die olie in ’n groot swaarboompan. Voeg die vleis by en braai tot kleur verander. Voeg die ui en knoffel by en braai vir omtrent 2 minute tot sag.
3. Voeg die tamaties, witwyn, kaneel en geurmiddels by en prut vir omtrent 10 minute totdat die meeste vloeistof afgekook is. Skep op die pasta en druk effens ferm.
4. Bolaag: Smelt die botter in ’n swaarboomkastrol. Voeg die meel by en verhit vir twee minute. Voeg die melk by, klits goed tot glad en verhit totdat dit verdik. Verwyder van hitte en voeg parmesaankaas by.
5. Giet die kaassous oor die maalvleis en sprinkel broodkrummels bo-oor. Bak vir ongeveer 30 minute in ’n voorverhitte oond teen 180 °C of tot ligbruin. Sprinkel gekapte vars origanum oor en sit warm voor.
Deur Heilie Pienaar Vrydag 10 April 2015 13:18
Beeld 10042015

Enjoyed this post? Share it!