Plaas aanval te Sannieshof, Noordwes – weduwee word aan haar hare gesleep en met vuis deur gesig geslaan

‘n Weduwee wat op ’n plaas naby Sannieshof in Noordwes woon, is Vrydag in die vroeë oggendure oorval, aan haar hare gesleep en met die vuis deur die gesig geslaan.

Blackie van den Berg (61) se buurvrou het die hele aanval en haar angskrete op die telefoon gehoor omdat Van den Berg die bure gebel het toe sy die rowers buite die huis gehoor het.

“Blackie het gesê: Hier kom hulle, julle moet kom. Hulle praat Afrikaans,” het die buurvrou, Coreen van den Berg, Vrydagoggend vertel.

“Sy het vir die rower wat in haar kamer was, gesê hy kan enigiets vat, maar hy het gesê hy soek vir haar. Hy het ’n spitvurk by hom gehad.”

Daar was vermoedelik twee rowers en hulle het gevlug toe Coreen se man, Bertus, sowat tien minute nadat Van den Berg hulle gebel het, op die plaas aangekom het.

Bertus se aankoms het haar lewe waarskynlik gered. “Die een rower het vir die ander een gefluit om hom te waarsku toe hulle Bertus sien aankom,” sê Coreen.

Van den Berg se een oog is heeltemal toegeswel, haar neus is vermoedelik gebreek en sy het wurgmerke, sê Coreen.

SY HET VIR DIE ROWER WAT IN HAAR KAMER WAS, GESÊ HY KAN ENIGIETS VAT, MAAR HY HET GESÊ HY SOEK VIR HAAR. HY HET ’N SPITVURK BY HOM GEHAD.

Coreen van den Berg
“Sy is nou in die Wilmedpark-hospitaal (in Klerksdorp).”
Volgens Coreen, ’n aangetroude niggie van Van den Berg, het sy hulle omstreeks 01:00 Vrydagoggend gebel en gesê sy hoor geluide buite die huis, maar sy het aanvanklik gedink dis dalk katte op die dak.
“Terwyl ons met haar praat, het ons ’n kapgeluid gehoor. Bertus het gesê dis beslis nie katte nie, in sy kar gespring en na Coreen gery.”

BLACKIE HET VIR DIE ROWER IN HAAR KAMER GEVRA HOEKOM DOEN HY DIT.
Coreen van den Berg

Terwyl Bertus op pad was na Van den Berg, het Coreen gehoor hoe haar niggie op die een rower wat in haar kamer ingekom het, geskiet het. Hy en sy makker het twee buitedeure en twee deure binne die huis oopgebreek.
Die makker was nie in Van den Berg se kamer nie. Sy het volgens Coreen in ’n stadium benoud gesê haar koeëls is op.
“Blackie het vir die rower in haar kamer gevra hoekom doen hy dit.”
Die polisie kon nie dadelik meer inligting oor die aanval verskaf nie. Dis nie seker of enigiets gesteel is nie.


Enjoyed this post? Share it!