Plaasaanval op jongman van Ficksburg – sy moeder vertel self

Die aanval in Ficksburg op Arend Corbett. Ons hou hierdie jongman in ons gebede. Sy moeder vertel self….Ons mag nie moed verloor nie! GOD IS GROOT!

Goeie more almal! Jammer dat ek nou eers ‘n update oor Arend opsit, die afgelope klompie ure was absolute chaos in ons lewens. Ek gaan vandag soos ek ‘n tydjie kry, probeer om almal se boodskappe te antwoord, jammer dat ek nie elke oproep kom antwoord en van donderdag aand kon laatweet hoe dit gaan nie.

Ek lê vanoggend in my bed en die trane borrel uit…maar dis trane van blydskap, dankbaarheid en verwondering. Na soveel plaasaanvalle wat reeds gebeur het en nogsteeds aan die gebeur is…is ons van die min mense wat vandag nog lewendig en met hoop in ons harte kan sit.

Ek wil graag die hele storie aan almal verduidelik sodat julle kan verstaan hoekom ons so geseend is.
Ek was donderdag middag klaar met werk en was alreeds 15:40 oppad om te ry, ek sou voor 17:00 reeds by die huis gewees het. My boetie het my gebel en met my begin praat oor hoe ons ons veiligheid moet opskerp en wat ek moet doen as ons dalk in die toekoms aangeval word. Ek het in my kantoor gebly tot ek klaar met hom gepraat het en toe in my kar geklim oppad ficksburg toe. As my boetie my nie op daardie oomblik gebel het nie, was ek donderdag voor Arend by die huis gewees.

Arend het net na 17:00 by die huis gekom met ‘n tralie hek op die bakkie wat hy by ons voordeur wou aansit vir veiligheid. Mense sê baie dat ons meer paraat en voorbereid moes gewees het…en ek was tot donderdag een van daardie mense wat altyd kon kritiek lewer dat mense hul wapens aan hulle moet dra…maar Arend sê hy het gesien sokkies (ons skaaphond) het vreeslik vir iets geblaf en voor hy enigsins kon reageer het 1 man met ‘n revolwer teen sy kop kom staan en 4 agter hom met messe, pype en knopkieries in hule hande.

Hy is beveel om uit die bakkie te klim en op sy kniëe te sak en in Sotho is vir hom gesê om te smeek vir sy lewe. Hulle het nie gevra vir geld of wapens of dat hy ons huis vir hulle moes oopmaak nie…hulle wou hom kom doodmaak. Arend het dit besef en begin baklei vir sy lewe toe hy moes afsak. Terwyl hy die wapen van sy gesig af probeer hou het, het die ander mans hom gesteek en geslaan. Arend sê keer op keer hy weet nie wat hy sou doen sonder Sokkies en Tsotetsi (die plaaswerker wat hom moes help om die tralie hek op te sit). 1 Aanvaller het met ‘n mes vir Tsotetsi aangeval en die ander 4 het by Arend gebly.

Die Here is groot, want hoe kon 1 man teen 4 aanvallers baklei en herhaaldelik geskiet, gesteek en geslaan word…en op die ou end hul wapen afvat en oorleef??? Hulle het toe besluit om te vlug en het in die berg wat agter ons huis is in gehardloop. Arend het op die roepradio vir hulp gevra en Tsotetsi het na die naaste huis gehardloop vir hulp. Arend is 3 keer geskiet waarvan 2 skote sy kop skrams gestref het en 1 skoot bo sy lip in is en agter sy linker oor uit is. Hy is 2 keer in die regter sy en onder die arm gesteek met ‘n mes en is herhaaldelik oor die kop, agter die nek en oor die rug geslaan met pype en knopkieries.

Arend is donderdag aand teater toe waar Dr. Vermaak sy wonde toegemaak het. Hy lê nog in die intensiewe sorg eenheid in Mediclinic.

Hy doen ongelooflik goed….hy gesels…sukkel bietjie met sy spraak maar hy is vol grappies. Hulle gaan vandag moontlik die dreierings pype wat orals in sy kop is, verwyder en ‘n scan doen om die omvang van die skade van sy linker wangbeen en kakebeen te bepaal. Ons sal moet wag tot die swelling om sy kop en gesig totaal gesak het voordag hulle enige rekonstruktiewe chirurgie kan doen.

Dankie aan mense oor die hele land se boodskappe van omgee en meeste van als dankie vir julle gebede…dit dra ons en hou ons positief en sterk. Dankie aan Afriforum wat uit hul pad gegaan het om ons te help, hulle het gesorg dat Arend per helikopter hospitaal toe gevlieg was en was heeltyd by ons vir ondersteuning.

Almal…wees versigtig, wees gereed en meeste van als, bid vir ons land, bid vir ons boere en glo dat God met ons almal is. Ons mag nie moed verloor nie! GOD IS GROOT!

Deur: Sanette Corbett


Enjoyed this post? Share it!