Plaaslike bank in SA voel vere na pensioenarise se geld uit rekeninge verdwyn

Pensioenarisse spaar jare lank en dan word hul geld binne minute uit hul bankrekeninge onttrek ná ’n onwettige simkaartomruiling.

Daarna word hulle maande lank van bakboord na stuurboord gestuur, op soek na antwoorde.

Bejaarde Absa-kliënte het Woensdag vertel hoe hulle duisende rande verloor het weens ongemagtigde simomruilings (sim swaps) en dan selfs meer as ’n jaar kan sukkel om antwoorde te kry.

“Van die banke tot die selfoonmaatskappye trek almal hul skouers op en pak die skuld op mekaar,” sê Ben Groenewald (81), ’n afgetrede assessor van Bloemfontein.

Hy het sowat R164 000 verloor uit sy tjekrekening op 29 Februarie 2016 nadat kubermisdadigers sy MTN-simkaart omgeruil en toegang tot sy internetbankdienste verkry het.

Hy het vermoed dat iets fout is toe hy nie sy aanlyn-bankdienste kon gebruik nie en sy selfoon nie meer wou werk nie. By navraag is hy ingelig dat sy Absa-rekening geblokkeer is.

“Jy spaar jare lank geld en dan is dit binne ’n paar minute weg. Daar sit ek toe sonder die geld en sonder ’n foon, terwyl die bedrae glo in Capitec-rekenings oorbetaal is.”

Groenewald sê Absa het later 50% van sy verlies aangebied, maar hy het dit van die hand gewys en sy klag na die Ombudsman vir Bankdienste geneem.

“Ek is skriftelik meegedeel dat ek nie die saak se besonderhede mag openbaar nie en sou ek my eis na die ombudsman verwys, val die skikkingsaanbod weg.”

Volgens Groenewald word daar “aanhoudend beweer” dat die slagoffers moes toegelaat het dat hul bankbesonderhede in die verkeerde hande beland het.
“Die bank dink ons is onnosel en sê dit is ons skuld, maar daar is geen bewys nie en hulle het nie eens na my rekenaar kom kyk nie.”

Richard Stevens (67) van Brits in Noordwes het ook op 24 Maart vanjaar onder ’n simomruiling deurgeloop, waarna R185 000 uit sy Absa-rekenings onttrek is.

Sy foon het ophou boodskappe ontvang en toe hy na ’n MTN-tak gaan, is hy ingelig dat sy simkaart ongeldig is en as gesteel aangemeld is. Die simkaart is glo op Welkom omgeruil.

Stevens het toe op ’n ander foon kennisgewings van Absa ontvang dat 36 begunstigdes met sy bankdienste geskep is en bedrae van R5 100 aan hulle oorbetaal is.

Hy is ook 50% van sy verlies aangebied en moes glo binne sewe dae aandui of hy dit aanvaar.

“Absa voel vere vir pensioenarisse en neem nie eens in ag dat jy al 40 jaar ’n kliënt is nie,” het hy gesê.

Hoewel hy die aanbod aanvaar het, sê Stevens hy gaan die saak verder voer en wil hê die hof moet banke dwing om slagoffers ten volle te vergoed.
’n Afgetrede egpaar van Port Elizabeth het ook in April 2016 deurgeloop toe R700 000 uit hul rekenings ná ’n sim-omruiling onttrek is.

Die ombudsman het later in Absa se guns bevind en die aanbod van 50% is toe teruggetrek, terwyl hulle in Desember ingelig is dat die bank die saak as “afgehandel” beskou.

Sedertdien is die man in Maart aan kanker oorlede en word regstappe oorweeg.
* Absa het in Junie gesê hy finaliseer opknapping van sy stelsels om ongemagtigde toegang tot bankrekenings moeiliker te maak.

By navraag of dit beleid is om slagoffers 50% van hul verlies aan te bied, het Absa gesê vergoeding hang van die omstandighede van die saak af.

Uitbetalings aan kliënte is ook nie ’n erkenning van skuld nie.

Absa is gevra waarom vertroulikheidsooreenkomste met kliënte nodig is en hy het gesê elkeen se omstandighede verskil, terwyl sommige kliënte kan glo dat hulle op dieselfde bedrag as ander geregtig is.


Enjoyed this post? Share it!