Plaasmoord: Man koelbloedig vermoor en vrou geskiet op plaas in Noordwes

’n Man is Dinsdagaand op ’n plaas naby Sannieshof in Noordwes vermoor en sy vrou geskiet nadat drie gewapende rowers hulle oorval het.

Die aanval het omstreeks 19:35 by die plaashuis gebeur.

Sers. Kelebogile Moleko, polisiewoordvoerder, het omstreeks 22:30 gesê die polisie is nog op die toneel besig met hulle ondersoek.

“Ons kan ongelukkig nie nou die identiteit of ouderdom van die slagoffers bekend maak nie.”
Die aanvallers het met die egpaar se wit Toyota dubbelkajuit bakkie met die registrasienommer FKZ-248-NW gevlug.

Moleko sê die vrou is eerste geskiet voordat haar man vermoor is.

Moleko het gesê ’n bejaarde vrou wat vermoedelik familie is van die slagoffers, was ook op die plaas.
Marius Müller, veiligheidskoördineerder van Afriforum, het Dinsdagaand gesê lede van hul buurtwag is op die toneel en probeer om die aanvallers vas te trek.

Volgens Afriforum het die aanvallers vermoedelik in die rigting van Ottosdal gevlug.
’n Helikopter is van Klerksdorp ontbied en die buurtwag het paaie rondom Klerksdorp, Ventersdorp, Coligny, Lichtenburg Hartebeesfontein en Ottosdal vir die gesteelde bakkie dopgehou.


 

Enjoyed this post? Share it!