Plaasmoorde: Statistiek toon dat daar reeds 47 plaasmoorde en 246 aanvalle in SA plaasgevind het vir 2017

Die jongste syfers oor plaasmoorde en -aanvalle van die TLU SA toon dat daar vanjaar reeds 47 plaasmoorde en 246 aanvalle was.

“Dit is uiters kommerwekkend en dien as bewys dat die polisie se onderneming om dié tipe misdaad as ʼn prioriteit te hanteer, nie in die praktyk uitgevoer word nie,” het dr. Pieter Groenewald, leier van die VF Plus, Donderdag in ʼn verklaring gesê.

“Die polisie sal dringend aandag moet gee aan veral landelike beveiliging en die polisie se misdaadintelligensie, in besonder oor plaasmoorde en -aanvalle, sal behoorlik moet begin funksioneer.”

Groenewald het gesê in die onlangse aanval by Wolmaransstad waar die boere self die aanvallers aangekeer het, was daar selfs ʼn lid van die polisie onder die beskuldigdes.

Hy het gesê dit beteken die polisie slaag nie daarin om misdadige elemente in eie geledere te verwyder nie ten spyte van die minister van polisie, Fikile Mbalula, se onderneming om dit te doen.

“Die hoë voorkoms van misdaad in Suid-Afrika vereis dat daar daadwerklike optrede van die polisie moet wees en nie net lippetaal deur die minister nie. Indien ʼn mens kyk na misdaad in die algemeen wil dit begin voorkom asof die polisie die stryd teen misdadigers begin verloor.”

Groenewald het gesê hy sal weer die kwessie van plaasmoorde en -aanvalle bespreek in die polisie se parlementêre portefeuljekomitee en sal verduidelikings vra oor die opskerping van landelike beveiliging en misdaadintelligensie in plattelandse gebiede.

“Ek wil my dank uitspreek teenoor landbougemeenskappe en organisasies soos TLU SA wat hul eie veiligheidstelsels in werking te stel. As dit nie vir dié effektiewe optrede was nie, sou syfers aansienlik hoër gewees het,” het Groenewald gesê.

Deur: Phillip Bruwer/Maroela Media


Enjoyed this post? Share it!