Plakkers dreig om skool af te brand in Brits

Sowat 100 plakkershutte is Maandagoggend vroeg van ’n stuk grond in Brits naby die Hoërskool Wagpos verwyder.

Woedende inwoners het die Rooimiere met klippe en petrolbomme gegooi en gedreig om die skool aan die brand te steek toe hul blyplek afgebreek is.

Van die inwoners het self hul hutte afgebreek.

 “Die Rooimiere beskadig die sink en die pale. Dit is duur goed wat ons nie weer kan bekostig nie. Ons haal dit liewer self af,” het een inwoner huilend gesê.

Volgens Stefan Pieterse, woordvoerder van AfriSake, het dié organisasie saam met drie ander aansoekers op 29 Junie ‘n hofbevel in die hooggeregshof in Pretoria verkry om die strukture te verwyder.

Hy sê die hutte aan die een kant van ’n grensdraad is nie afgebreek nie omdat die eienaar van dié grond nie deel was van die aansoek nie.

“Dit is net die leë plakkershutte aan die een kant van die heining wat ons verwyder.”

Die strukture op dié stuk grond is blykbaar net meer as ’n maand gelede daar opgerig.

Volgens Pieterse het almal kennisgewings gekry voordat die strukture afgebreek is.

“Die balju was die afgelope maand twee keer hier. Die mense het kennisgewings gekry wat sê hulle mag nie daar bly nie. Hulle het toe aangegaan met die bouery.”

Ao. Mpeile Talane, polisiewoordvoerder in Noordwes, sê van die inwoners het probeer om die proses te ontwrig deur petrolbomme en klippe te gooi. Van hulle het ook probeer om die paaie te versper.

“Ons was daar om seker te maak die uitsetting is so rustig as moontlik,” sê hy.

Bron: Netwerk24


 

Enjoyed this post? Share it!