Polisie in Noord-Kaap mag uiteindelik weer in Afrikaans werk

Die polisie in die Noord-Kaap het Donderdag ná ’n vergadering met belanghebbendes glo die omstrede taalbeleid, waarvolgens alle verklarings in dié provinsie van die publiek voortaan in Engels afgelê word, onttrek.

Luidens ’n interne skrywe deur die polisie in die Noord-Kaap het Solidariteit, die Pan-Suid-Afrikaanse Taalraad (Pansat) en bestuurslede van die polisie in die provinsie Donderdag in Kimberley vergader.

Op dié vergadering is ooreengekom dat die taalbeleid onttrek word.

“’n Ooreenkoms is bereik en die taaldirektief in die provinsie word onttrek,” lui ’n gedeelte uit die skrywe.

Die vergadering volg nadat Solidariteit vroeër vandeesmaand bekend gemaak het dat hulle dié beleid in die hooggeregshof gaan beveg.

Dít na ’n opdrag op 5 September 2016 van die provinsiale bestuur waarvolgens alle verklarings van die publiek voortaan in Engels afgelê moet word.

Polisielede moet ook alle verklarings wat in Afrikaans afgelê word, in Engels vertaal.

Polisielede wat nie aan die opdrag gehoor gee nie, kan dissiplinêr aangekla word.

Anton van der Bijl, hoof van Solidariteit se sentrum vir billike arbeidspraktyke, het die vergadering bevestig, maar wou geen kommentaar lewer voordat die onderhandelinge afgehandel en op skrif gestel is nie.

“Geen formele skikking en ooreenkoms is geteken nie.”

Hy sê hy sal eers teen Maandag of Dinsdag kommentaar lewer wanneer alles afgehandel is.

Dr. Conrad Steenkamp, uitvoerende hoof van die Afrikaanse Taalraad (ATR), sê hy het nie die vergadering bygewoon nie, maar het die besluit verwelkom en dit as ’n stap in die regte rigting beskou.

“Ek is bly dat daar gehoor gegee is aan die stemme uit burgerregteorganisasies.”

Hy het ook die polisie vir hul buigsaamheid geloof.


Enjoyed this post? Share it!