Polisie ontken gerugte van korrupsie oor waarnemende Valke-hoof

Brig. Hangwani Mulaudzi, woordvoerder van die polisie se direktoraat vir prioriteitsmisdaadondersoek, sê gerugte dat die waarnemende hoof van die Valke, lt.genl. Yolisa Matakata, oorsee gereis het as deel van die Valke se ondersoek na beweerde korrupsie en e-poslekke, is vals.

Mulaudzi het gesê die Valke het verskeie navrae gekry van lede van die publiek én die media wat daarop dui dat Matakata na die Verenigde Arabiese Emirate gereis het om dié geheime korrupsie en e-posse te ondersoek.

“Twee nasionale koerante het gesê dat sommige publikasies waarskynlik dié gerug sal publiseer, ondanks ons bevestiging van die teendeel,” sê Mulaudzi.

Hy sê Matakata het na die buiteland gereis op uitnodiging van die departement van internasionale verhoudinge om deel te neem aan die eerste vergadering van senior amptenare in Naypyitaw, Mianmar se hoofstad, op 17 Augustus.

“Die doel van die reis was om die raamwerk van samewerking te vestig wat samewerking tussen ons en Mianmar sal toelaat ten opsigte van die voorkoming, bekamping en ondersoek van transnasionale misdade,” het hy bygevoeg.

Deur: Maroela Media


Enjoyed this post? Share it!