Polisie soek Moordernaar van Tewie en Eurika Human

Polisie soek meesterbrein in dubbelmoord

Die polisie het ‘n man geïdentifiseer wat hulle glo die meesterbrein is in die wrede dubbelmoord op die egpaar, Tewie en Eurika Human, van Groot-Brakrivier.

Volgens die polisie het Lebohang Rethabile Lekoro (in sy laat twintigs of vroeg dertigs) waarskynlik uit die land gevlug na die moorde. ‘n Lasbrief vir sy inhegtenisname is reeds uitgereik.

Dit volg nadat ‘n 26-jarige man, Thamsamqa Howard Sishuba, van die Wolwedans-woonbuurt op Groot-Brakrivier in die landdroshof op Mosselbaai verskyn het. Hy is verbind met forensiese bewyse wat op die toneel gekry is.

Die saak is tot Vrydag uitgestel sodat hy regsverteenwoordiging kan kry.

‘n Vriendin van Tewie en Eurika Human het op 18 Junie na hulle huis in Sandhoogtepad gegaan, en het saam met bure deur ‘n slaapkamervenster gekyk en besef dat Eurika vermoor is. Die egpaar was waarskynlik sowat vier dae vantevore al vermoor toe hulle ontdek is. Hulle twee honde was saam met die vermoorde Eurika in die huis toegesluit, terwyl Tewie in die motorhuis vermoor is.

Eurika is verskeie kere met ‘n skerp voorwerp in die nek en bors gesteek en haar man is met ‘n kapmes teen die kop en bolyf gekap.

‘n Plaaslike koerant berig dat die Humans se huiswerker, wat elke Woensdag by die egpaar werk, aanvoer sy het ‘n boodskap gekry dat sy Woensdag, 15 Junie, nie hoef te werk nie. Sy het dus nie soos altyd na die egpaar se huis gegaan nie. Die polisie volg tans hierdie inligting op.

Foto – Lebohang Rethabile Lekoro

Bron:Vryburger


Enjoyed this post? Share it!