Polisie trek vyf vas, vind vuurwapens terug

 

Polisielede van Bultfontein het Donderdagaand ’n groot deurbraak gemaak in die bekamping van misdaad toe hulle vyf mans in hegtenis geneem en vier wapens teruggevind het. Hier is konsts. Mangaliso Gotyana (links) Reitumetse Senkge, Mooeketsi Ntlathi, Leoatle Leoatle (voor met die wapens) en Mojalefa Ngake (regs met die koeëls in die hand) met die wapens en vier van die mans wat aangekeer is.

Die polisie in Bultfontein het waarskynlik nog misdade en moontlike bloedvergieting voorkom toe hulle vyf jong mans in hegtenis geneem en die wapens wat hulle na bewering vroeër vandeesmaand op ’n plaas in die omgewing gesteel het, teruggevind het.

Die mans, tussen die ouderdomme van 22 en 26 jaar, verskyn na verwagting Maandag in die hof in Bultfontein vir die onwettige besit van vuurwapens en ammunisie nadat hulle Donderdag in hegtenis geneem is.

ONS IS BLY EN LOOF DIE POLISIE VIR HUL GOEIE WERK.

Herman Meiring

Die inhegtenisname kom net meer as week nadat daar by Leon Venter, ’n boer van die plaas Pentzplaas in die Bultfontein-distrik, ingebreek en sy wapens gesteel is.

Die diewe het ’n skootrekenaar, kamera, horlosie en ou muntstukke gebuit en in Venter se bakkie gevlug. Die bakkie is die volgende oggend teruggevind.

Venter sê hy is dankbaar sy wapens is terugvind voordat dit in die uitvoer van ander misdade gebruik kon word.

“Ons was kerk toe die dag en toe ons by die huis kom het ek agtergekom die bakkie is weg en daar is by die huis ingebreek.

“Ek is baie dankbaar die wapens is terug. Hulle het alles teruggekry behalwe die rekenaar,” sê hy.

Volgens sers. Ian Gaobepe, polisiewoordvoerder, het ’n informant van konst. Leoatle Leoatle van die Bultfontein-polisiekantoor, hom gebel en gesê vier mans loop met ’n wapen in die straat in die Mhahameng-woonbuurt in Bultfontein.

Leoatle en konsts. Reitumetse Senkge, Mooeketsi Ntlathi, Mangaliso Gotyana, Mojalefa Ngake, Lehlohonolo Morapedi en Mpho Monne, het die mans omstreeks 19:00 aangekeer en ’n windbuks in hul besit gekry.

“Die mans was waarskynlik op pad om ’n misdaad te pleeg toe hulle aangekeer is. Dit is goed dat ons hulle kon arresteer voor hulle weer kon toeslaan,” sê Gaobepe.

Volgens hom het die polisielede die mans ondervra en die verdagtes het hulle gaan wys waar die ander twee wapens by hul onderskeie huise versteek is.

Die polisielede het ontdek die wapens stem ooreen met die wapens wat vroeër by Venter gesteel is.

Hulle het die mans verder ondervra, wat die polisie gelei het na die ontdekking van nóg ’n vuurwapen.

Die gesteelde kamera, horlosie en ou muntstukke is ook teruggevind.

Gaobepe sê die polisie sal nou die mans met die diefstal op Venter se plaas probeer verbind.

Herman Meiring, voorsitter van die Bultfontein-landboudistrik, sê hulle is bly en verlig die mans is aangekeer en die wapens teruggekry voordat hulle in ander misdade gebruik kon word.

“Dit is min dat wapens so vinnig teruggevind word. Dit is ’n groot deurbraak wat die polisie gemaak het. Ons is bly en loof die polisie vir hul goeie werk,” sê Meiring.

Bron – Netwerk24


 

Enjoyed this post? Share it!