Rantsoen Pakkies vir Nood toestande

Rantsoen Pakkies vir Nood toestande

rat-pack2 rat-pack1

Een van die meer basiese behoeftes en groot bekommernis daar tussen skuiling, veiligheid en hitte is kos en water. In die weermag het ons manne vir dae aaneen op rantsoenpakke of “rat-packs” geleef en hulle eie water uit riviere gesuiwer. Mens kan wel sulke rantsoenpakke op die internet bestel, maar teen ongeveer R 65 sonder die posgeld. Ek dink as mens mooi die ding gaan bekyk kan mens dalk met goedkoper wegkom. Die weermag rantsoenpakke was heel voldoende en dis ‘n goeie voorbeeld om te gebruik vir die aanmekaarslaan van ons eie weergawes. Kom ons kyk gou na die inhoud van die basiese weermag rantsoenpak:

• 4 Lang polyethelene sakkies
• 2 Blikkieskos
• 2 Sjokolade energiestafies
• 2 “Cheesies” (geprosesseerde kaas)
• 8 Vuurtablette
• 1 Pakkie vuurhoutjies
• 2 Pakkies droë beskuitjies (Dogbiscuits in die weermag)
• 2 Stafies versuikerde droë vrugte
• 1 Pakkie woestersous
• 1 Pakkie tamatiesous
• 6 Pakkies suiker
• 2 Pakkies sout
• 1 Pakkie peper
• 2 Pakkies kitskoffie met verromer by
• 2 Pakkies kitstee met verromer by
• 2 Pakkies kitssop
• 1 Pakkie kitspap of 2 graanstafies
• 2 Pakkies aanmaak koeldrank
• 2 Rolle energie lekkergoed (soos Super C)
• 4 Stukkies kougom
• 1 klein blikoopmakertjie

‘n Goeie beginpunt vir die probleem van kos vir 24 uur – al wat jy nou moet besluit is hoe om dit te verpak; wil jy dit net in ‘n groot “Ziploc” sakkie sit vir maklike berging wat min plek opneem? Jy kan selfs dalk in iets soos ‘n leë koffieblik sit wat jy as ‘n ketel of emmertjie ook kan gebruik en ander goed ook in kan stoor soos mediese goed, hoeke, vislyn, tou ens. en moontlik een liter water? Die keuses hang af van die grootte van die rugsak en die krag in die skouers wat dit moet dra.
Mens kan die sakkies en blikke aanmekaarsit, dit in rugsakke vir elkeen inpak en gereed sit om te “gryp en gaan”, of so paar in die motor se kattebak bêre en so meer. Mens sal net moet versigtig wees om te kyk na als se vervaldatums.

As ‘n moontlike alternatief teenoor die weermag “rat-pack”, hier is nog ‘ goeie voorbeeld van ‘n een-persoon 24-uur rantsoenpak:
• 1 Blik Bully-bief (Leë blik kan as ‘n beker gebruik word)
• 1 Blik Bone en worsies (meatballs & spaghetti, of watookal jy verkies)
• 2 Buisies tamatiesous
• 1 Buisie harde lekkergoed (Super c’s)
• 1 Kelloggs ontbytstafie
• 1 Jungle energiestafie
• 2 Pakkies aanmaak koeldrank
• 4 Pakkies Cremora
• 2 Sakkies koffie
• 2 Teesakkies
• 8 Sakkies suiker
• 2 Sakkies peper
• 4 Sakkies sout
• 1 Klein pakkie koekies
• 4 Kougom
• 1 Plastiek lepel
• 6 Vuurmaak tablette
• 1 Dosie vuurhoutjies
• 1 Stuk koerant (vir vuurmaak/toiletpapier)
• 4 Toffies (soos Wilsons)
• 2 Plastieksakkies (vir goed meng/water opvang)
• 2 Sakkies kitssop
• 1 Buisie geprosesseerde kaas
• 1 Helfte van ‘n kers (lig, vuurmaak hulpmiddel en blikkieskos opwarm)
As jy wil vermy om ‘n klein blikoopmakertjie by te sit, kies blikkieskos wat met ‘n trekring of sleutel oopdraai, anders sal jy die oopmakertjie moet insluit, tensy jy goed met ‘n mes is, en in die eerste plek onthou het om jou mes saam te bring! (Hopelik het jy – dis amper die belangrikste item van oorlewing!)

Enjoyed this post? Share it!