Roedtan-moorde: Voormalige werknemer in hegtenis geneem -1 van 8 verdagtes

‘n Voormalige werknemer is een van agt mans wat in hegtenis geneem is ná die dubbele moord op die renosterboer Piet van Zyl (68) en sy vrou, Tilla (66), van Roedtan in Limpopo.

Dié man, Vision Mbongwe, van Zimbabwe is Maandag in hegtenis geneem by die Entabeni-wildreservaat buite Mookgophong, waar hy gewerk het.

Hy en nóg sewe mans het Donderdagoggend vlugtig in die landdroshof op Lebowakgomo op onder meer aanklagte van moord en gewapende roof verskyn.

Die sewe mans kan glo verbind word met Joseph “Big Joe” Nyalunga, vermeende baasbrein agter verskeie sake wat met renosterstroping verband hou. Nyalunga is ’n oudpolisielid en is in Desember 2011 in hegtenis geneem. Hy is tans verhoorafwagtend.

Bongani Mabuza (35), Bheki Mhlabane (30), Mpho Mbuyane (33), Nthando Shabane (29), Sfiso Mlazi (36) en Dumisani Nkosi (33) is Maandagoggend vroeg in Hazyview, naby Mbombela (Nelspruit), in hegtenis geneem.

Lede van die Heritage Protection Group (HPG), ’n misdaadbestrydingsorganisasie wat deur oudpolisielede gestig is, het saam met die polisie in Limpopo en Mpumalanga die mans in hegtenis geneem nadat hulle inligting ontvang het.

Tydens die inhegtenisnemings is beslag gelê op R40 000 kontant wat die mkans by hulle gehad het. In een van die huise waar hulle aangekeer is, is daar op ’n polisie-uniform beslag gelê.

Die agtste verdagte, Nhlanhla Phiri is Dinsdagoggend in Lenasia, suid van Johannesburg, aangekeer. Die polisie het nie gesê hoe oud hy is nie.

Die Van Zyl’s is op 20 Augustus in hul plaashuis in die Immerpan-distrik buite Roedtan, in Limpopo, vermoor.

Piet is vyf keer geskiet en Tilla een keer. Hul bebloede lyke is in hul slaapkamer gekry.

’n Sleutel is aan die buitekant van ’n glasdeur van die huis gekry. Dit is vermoedelik hier waar die moordenaars ingekom het.

Van Zyl het renosters op sy plaas gehad en hy was in Desember erg ontsteld toe ’n renosterkoei gestroop is.

Hy het toe gesê: “Ek gee moed op. Dit kan nie so aangaan nie, ons diere word almal doodgemaak.”

Hy het gesê die afgemaaide renosterkoei, was die tiende renoster wat aan hom behoort het, wat gestroop is. “Al my diere is onthoring, maar die stropers is so arrogant hulle maak steeds die diere dood. Vir wat?”

Van Zyl se renosters is kort daarna na ’n veilige plek verskuif.

Tilla het gesê in 2015 is vier van hul renosters op Oukersdag doodgeskiet vir hul horings. Die egpaar het gewapende wagte aangestel om hul renosters te beskerm.

Die agt mans sal in aanhouding bly totdat hulle waarskynlik volgende week om borgtog sal aansoek doen.

Deur: netwerk24.com


Enjoyed this post? Share it!