Tien Gewapende Rowers sak toe in Balfour op Sunfield Fortuna Huis vir Gestremdes

Sunfield Fortuna Tehuis vir verstandelike-en liggaamlike gestremde persone is oorval deur  ’n  groep swaar gewapende mans wat geld en duur elektroniese toerusting geëis het. 

Die voorval het plaas gevind op Dinsdag 28 Februarie omstreeks 21:30.  Brenda Gous, die Huis Bestuurder het gevrees vir die veiligheid van haar inwoners en het ten alle koste probeer verhoed dat die booswigte hulle leed aandoen.  “Ek het gedink ons einde het aangebreek en deurentyd hardop gebid. Ek was heeltyd bang dat een van die inwoners wakker word en deur die rowers doodgeskiet sou word.”

Tien rowers het Brenda Gouws se huis binnegeval en geld geëis.  Volgens Louw Maritz, direkteur van Sunfield Fortuna  was daar 2 inwoners saam met Brenda in die kombuis ten tye van die voorval. Hulle het ’n klop aan die kombuisdeur gehoor en na verdere ondersoek drie mans gewaar by die venster.  Die mans het gedreig om op hulle te skiet indien hulle nie die deur oopsluit nie.  Brenda het nie toegee aan hulle versoek nie en die deur is binne sekondes oopgeskop.

Intussen het vier rowers by die 2 inwoners in die huis agtergebly. Hul hande en voete is vasgebind en hulle is gedwing om op hul knieë voor die bed in die hoofslaapkamer te staan.  Die manlike inwoner wat by Gouws se huis was, is met ’n breekyster geslaan. Hy moes steke kry. ’n Vroue-inwoner wat saam met hom daar was, is vasgebind en verskreeu, sê Maritz.

Die rowers het Gouws se hande vasgebind en haar na die kantoor, sowat 200 m van haar huis, gedwing. Toe sy weier om die kluis oop te sluit, het hulle gedreig dat almal haar sou verkrag.  Die kluis is oopgemaak, maar daar was geen geld in nie. Die rowers het ’n kontanttjek vir R100 000 geëis. Na sy aan hul verduidelik het dat die tehuis nie soveel kontant in hulle rekening het nie, het hul haar toe gedreig om die inwoners van die tehuis te skiet.  Sy het toe aangebied om aan hulle ’n kontant tjek ter waarde van R20 000 uit te maak.  Daarna is sy terug gedwing na haar huis waar hulle buitgemaak het van elektroniese ware en selfone.  Hulle is kort daarna vort met die tehuis se Toyota Quantum-bussie.

Toe Brenda hoor dat die bussie weg is, kon sy daarin slaag om haar hande los te woel en het terug na haar kantoor gehardloop om hulp te soek.

Rowers sak toe in Balfour op Sunfield Fortuna – Huis vir Gestremdes

Brenda Gouws Sunfield Fortuna Huis Bestuurder

Die bussie is gelukkig met ’n satellietopsporingstelsel sowat 15 km van die tehuis afgekry . Die  polisie was spoedig op die toneel en het dit gefynkamp vir enige lydrade.  Niemand is nog egter in hegtenis geneem nie.

’n Paar maande gelede was daar ook ’n aanval geloods op Gouws se woning, maar hulle aanslag het misluk. Volgens Maritz is die  terrein omhein en belig, maar hulle sal versekerd weer die veiligheid van die perseel moet hersien.

Die tehuis met sy sowat 100 inwoners sukkel om kop bo water te hou en is van skenkings afhanklik. Van die inwoners is hewig ontsteld oor wat met hulle “ma” gebeur het.  Maritz sê hulle is trots op Brenda dat sy ten tye van die voorval  kopgehou het en kalm gebly het.  Sy is ’n yster.

Rowers sak toe in Balfour op Sunfield Fortuna – Huis vir Gestremdes

Inwoners van Sunfield Fortuna Tehuis


 

Enjoyed this post? Share it!