SA is toe nie gister na rommel status af gegradeer nie

‘Pravin beslis grootste wenner ná S&P se besluit’

Politieke ontleders het gister só gesê nadat die internasionale kredietgradeerder Standard & Poor’s (S&P) die land se kredietgradering nie verander het nie.

Prof. Susan Booysen, politieke ontleder aan die Universiteit van die Witwatersrand, sê die nuus is baie goed vir die regering en die ANC.

 “Dit is veral goeie nuus vir pres. Jacob Zuma omdat ’n afgradering sy oorblywende termyn as president erg sou gedestabiliseer het.

“Daar is egter geen twyfel nie dat Gordhan bedank moet word omdat hy die boodskap aan beleggers en die buiteland – dat hy in beheer van die ekonomie is – uitgekry het, ondanks die chaos wat daar rondom hom hang.

“Zuma se politieke oorlewing hang nou van Gordhan af en die president sal moet verseker dat hy Gordhan baie goed behandel.

“Zuma moet dit doen omdat sy politieke loopbaan byna by die afgrond afgestort het.”

Prof. Dirk Kotze, politieke ontleder by Unisa, stem saam dat Gordhan die meeste baat gevind het by die situasie.

“Dit gee ook nou aan Gordhan sterker bedingingsmagte in die ANC en die regering, terwyl dit die moontlikheid dat die Valke en die NVG hom verder gaan vervolg, ook baie kleiner laat.”

Kotze sê Zuma sal dit egter ook vir sy eie voordeel gebruik.

“Hy sal wil duidelik maak dat hy in beheer van die regering is en dat die afgradering deur sy eie leierskap afgeweer is.

“Gordhan moet egter die grootste lof kry. Dit wys dat sy benadering deur beleggers, kredietgraderingsmaatskappy en die buiteland ondersteun word.”

Volgens Kotze kan dit net voordelig vir die hele Suid-Afrika wees

Netwerk24


 

Enjoyed this post? Share it!