‘SABC-besluit belaglik, kortsigtig’

Die SABC het Donderdag in ’n verklaring gesê hy keur die afbrand van openbare instellings soos skole ten sterkste af.

“Daarom het ons ’n besluit geneem om onmiddellik nie meer beeldmateriaal van mense uit te saai wat openbare instellings afbrand nie omdat ons ’n openbare uitsaaier is,” lui die verklaring.

 Sheniece Linderboom, hoof van die regskliniek by die ­Freedom of Expression Institute, het gesê dit word gedoen om korrupsie en swak dienslewering weg te steek en toe te smeer.

“Die nuusmedia moet aan landsburgers se probleme gehoor gee. Dit is hoe ’n mens help om geweld te voorkom. Nie om daaroor te swyg nie,” het sy gesê.

Hlaudi Motsoeneng, bedryfshoof van die SABC, het gesê hulle gaan wel nog oor betogings berig, maar net nie die geweld wys nie.

Dié besluit ondermyn die geloofwaardigheid van die SABC, meen Max du Preez, politieke ontleder.

“Dis roekeloos om nuus te manipuleer. Dis soos in apartheid waar die media nie kon berig oor wat in townships gebeur het nie.

Volgens Raymond Louw, adjunkvoorsitter van die Suid-Afrikaanse Redakteursforum (Sanef), is dit verskriklik. “Dis niks anders as sensuur nie. Dit is belangrike inligting wat hulle van landsburgers gaan weerhou.”

Volgens Anton Harber, hoofredakteur van eNCA, gaan hulle beslis nie nuus sensureer nie, al is dit ongemaklik.

Bron – Netwerk24


 

Enjoyed this post? Share it!