‘SABC is nou in ’n krisis’

Kaapstad. – “Ek is in beheer, julle moet my instruksies volg. President Zuma is die president van die land . . . En ons sal hom meer tyd gee. En julle kan almal bevraagteken – Mantashe et al – behalwe vir die president.”

Dít was die woorde van Hlaudi Motsoeneng, SABC-bedryfshoof, by ’n werksessie oor die SABC se verkiesingsdekking, soos vervat in hofstukke deur die agt joernaliste van die SABC wat deur tugstappe in die gesig gestaar word.

Thandeka Gqubule, sakeredakteur van die SABC, vra in ’n beedigde verklaring, wat ook namens Foeta Krige, Suna Venter, Lukhanyo Calata, Vuyo Mvoko, Jacques Steenkamp, Busisiwe Ntuli en Krivani Pillay gelewer is, dat die konstitusionele hof die SABC se beleid om nie gewelddadige protesaksie uit te saai nie, ongrondwetlik verklaar. Hulle vra ook dat dié aansoek dringend aangehoor word.

“Die aansoek sal bepaal of SABCjoernaliste hul werk sal kan doen en kan berig oor aktuele sake in die aanloop tot die munisipale verkiesing en daarna,” lui die verklaring.

Gqubule sê die gebeure die laaste paar weke by die SABC het joernaliste se situasie daar onhoudbaar gemaak. “Dit raak nie net die joernaliste wat vir die SABC werk nie.

Dit verhoed dat die SABC sy pligte as openbare uitsaaier nakom.

“Daar is 21 miljoen mense wat op die SABC staatmaak as hul primêre bron van nuus.”

Sy sê die gebeure by die SABC skend daarom die grondwetlike regte van joernaliste, maar ook die publiek se reg om inligting en idees te ontvang. “Indien dié hof nie die aansoek om direkte toegang toestaan nie, is die praktiese werklikheid dat die skending van die publiek en joernaliste se regte vir jare sal voortduur. Dit is omdat diegene met mag by die SABCalles in hul vermoë sal doen om ’n finale beslissing oor die kwessie vry te spring.”

Sy het Motsoeneng se uitgerekte hofstryd om in sy pos aan te bly ondanks ’n rits verdoemende bevindings teen hom deur die openbare beskermer, ter stawing gebruik.

Sy noem ook hoe joernaliste deur die bestuur gedreig word. Op ’n vergadering op 31 Mei oor die omstrede protesbeleid, het Motsoeneng glo gesê: “As mense dit nie nakom nie, raak ontslae van hulle. Ons kan nie mense hê wat die bestuur bevraagteken nie . . . dit is die laaste keer dat ons dié tipe vergadering sal hê.”

“Gegewe die kultuur van vrees en stilte wat nou in die SABC-nuuskantoor heers, is die SABC nou in ’n krisis,” sê Gqubule.

Bron: Netwerk24


 

Enjoyed this post? Share it!