SABC: ‘Sensuur bedreig verkiesing’

Solidariteit en Zwelinzima Vavi snoer nou kragte saam teen sensuur by die SABC.

Die vakbond, wat sommige van die joernaliste in hul sensuurverwante tugsake verteenwoordig, sê hy wil die konstitusionele hof regstreeks oor die kwessie nader omdat die munisipale verkiesing oor minder as ’n maand gehou word.

Vavi het gister gesê hulle ­koördineer met Solidariteit.

 “Ons sal ’n aansoek by die konstitusionele hof wil indien omdat ons dink dit sal onmoontlik wees om ’n vry en regver­dige verkiesing te hê as die nuus gesensor word,” het hy ­gesê.

Intussen is ’n tugsaak teen ’n sewende joernalis, Lukhanyo Calata, begin.

Calata, die seun van Fort ­Calata, een van die Cradock-vier, het verlede week in ’n brief aan Cape Argus gesê die rigting waarin die SABC nou beweeg, druis direk in teen dit waarvoor talle mense opofferings gemaak het.

Hlaudi Motsoeneng, bedryfshoof van die SABC, het Vrydag volgens Vavi gesê hy weet nie wat die klagte teen die joernaliste is nie, maar hy sou die naweek uitvind.

Gister het hy op kort kennisgewing ’n vergadering met Vavi en verteenwoordigers van onder meer Right2Know, die SOS Coalition en vakbonde gekanselleer.

Volgens Vavi het hy gesê hy is aangeraai om nie met hulle te vergader nie en hy gaan die klagte teen die joernaliste nie ­terugtrek of hul skorsings ophef nie.

Die geskorste RSG-joernalis Suna Venter, wat saam met die afvaardiging by die SABC opgedaag het, het gesê dit is vir hulle moeilik om te swyg oor die saak. “As joernaliste weet ons: Ons werk met die waarheid. Ons werk met inligting. Dit is baie moeilik om dit nie te kan doen binne jou kantoor nie en ook nie buite jou kantoor nie.

“Maar ek dink ons teenwoordigheid hier vandag sê genoeg.”

Solidariteit sê al wat kan keer dat die saak na die konstitusionele hof gaan, is as Motsoeneng die opdragte aan die joernaliste terugtrek en nie die redaksionele beleid toepas soos wat dit tans gebruik word nie.

Johan Kruger, adjunkbestuurshoof van Solidariteit, sê hulle behoort teen oormôre hofstukke aan al die betrokke partye te beteken om só aansoek om direkte toegang tot die hof te doen. “Dit is in die openbare belang en in die belang van die beskerming van grondwetlike demokrasie.”

Kruger sê die saak gaan oor vryheid van spraak, die reg om te weet en die reg op inligting.

Omdat dit belangrike grondwetlike beginsels is, meen Solidariteit dit moet regstreeks ingevolge die Grondwet gehanteer word om rigting te verskaf.

Volgens Kruger is hul argument dat hulle juis direk toegang tot die konstitusionele hof moet verkry omdat dit nou ’n maand voor die verkiesing is.

Gewoonlik loop die regsproses eers deur die laer howe.

“Wat die ding dringend maak, is die reg van almal om voor die verkiesing inligting op ’n gebalanseerde en deursigtige manier te kry,” sê Kruger.

Bron:Netwerk24


 

Enjoyed this post? Share it!