Skokkend: Gr. 1-leerder van Limpopo neem eie lewe by skool – ‘n kind bly ‘n kind, ongeag!

Die polisie in Limpopo het ʼn beweerde gebrek aan veiligheidsmaatreëls en kinderverwaarlosing by skole in dié provinsie sterk veroordeel.

“Dit kom nadat ʼn sesjarige seun wat in gr. 1 is Vrydag in die badkamer van die skool aangetref is waar hy homself glo opgehang het,” het lt.kol. Moatshe Ngoepe, woordvoerder van die polisie, gesê.

Die voorval het tussen 11:30 en 12:30 by die Dorothy Langa Primary School in Seshego buite Polokwane plaasgevind.

Die seun, Mohau Mamaregane, het glo gevra of hy mag badkamer toe gaan. “Toe hy nie terugkom klas toe nie is ʼn ander leerder gestuur om na hom te gaan soek en dié het toe die gru-ontdekking gedoen,” het Ngoepe gesê.

Volgens hom is die seun na ʼn plaaslike kliniek gehaas vir behandeling, maar is by sy aankoms dood verklaar.

Die omstandighede en motief is volgens Ngoepe nog nie bekend nie. ʼn Nadoodse ondersoek sal gedoen word.

Ngoepe het veral onderwysers gemaan om kinders se veiligheid eerste te plaas en ten alle tye te weet waar leerders hulle bevind.

Die ondersoek duur voort.

Deur: Maroela Media


Enjoyed this post? Share it!