Sneeuneerslae vir Oos-Kaap voorspel

Trek die wollerige skootkomberse en warmwatersakke nader, want die winter sal met mening die naweek in die Oos-Kaap gevoel word.

Die weerkantoor in Port Elizabeth waarsku dat ’n hewige kouefront teen Vrydag deur die Oos-Kaap sal beweeg.

“Die kouefront sal teen Vrydagoggend die westelike dele van die provinsie raak,” sê Garth Sampson van die weerkantoor. “Teen Vrydagaand sal dit na die ooste beweeg, en koeler temperature saambring.

 “Aansienlike reënval, tot 20 mm in sommige plekke, word langs die kus tussen Plettenbergbaai en Port Alfred verwag.”

Sneeu sal ook van Vrydagaand oor die Sneeuberge val, voordat dit Saterdagoggend na die suidelike Drakensberge en ander hoogliggende dele skuif.

Voor dié sneeukombers sal inwoners eers op die uitkyk moet wees vir brandgevaar, waarsku Sampson.

“Daar sal Donderdag waarskynlik brandgevaar in die Oos-Kaapse binneland wees,” sê hy.

’n Veldbrand het reeds Woensdagoggend naby Grahamstad langs die N2 ontstaan.

Netwek24


 

Enjoyed this post? Share it!