So Lieg Prasa Doktor Mtimkulu en Steel Miljoene

So Lieg Prasa Doktor Mtimkulu en Steel Miljoene

Prasa Doktor Mtimkulu

JOHANNESBURG – Daniel Mtimkulu, voormalige ingenieurshoof van die Passasierspooragentskap van Suid-Afrika (Prasa), het sy werkgewer glo uit meer as R15 miljoen bedrieg omdat hy op grond van vervalste dokumente reuse-verhogings gekry het.
Luidens dokumente wat Donderdag in sy tugverhoor deur Prasa in Johannesburg, Sentraal-Transvaal bekend gemaak is, het hy voordeel van R15 187 640 daaruit getrek. Mtimkulu, wat nie vir sy verhooropgedaag het nie, word aangekla van “growwe oneerlikheid, bedrog en skade wat hy Prasa se reputasie berokken het”.
Luidens Prasa se amptelike dokumente het Mtimkulu beweer hy het ’n diploma in meganiese ingenieurswese aan die Vaal-Universiteit van Tegnologie (VUT) en ’n graad in meganiese ingenieurswese aan die Universiteit van die Witwatersrand verwerf. Hy het ook volgehou hy het ’n meestersgraad en ’n doktorsgraad in ingenieurswese aan ongespesifiseerde instellings verwerf. Mosenngwa Mofi, groephoof van Prasa, het Donderdag getuig hy het op grond van mediaberigte oor Mtimkulu se kwalifikasies besluit om ondersoek te laat instel.
Mofi het glo die mensehulpbronne-afdeling en Lucky Montana gekontak. Mtimkulu het hom egter met selfvertroue verseker dat Mofi nie oor die aantygings teen hom bekommerd hoef te wees nie. Mtimkulu het kopieë van die sertifikate wat hy na bewering aan die VUT behaal het, aan Mofi verskaf. Dit is egter vervals. Die universiteit het ook aan Prasa bevestig dat Mtimkulu daar ingeskryf was, maar sy studie nie voltooi het nie. Mtimkulu self het in ’n SMS teenoor ’n bestuurslid erken hy het die kwalifikasies vervals.
Mtimkulu het glo ook ’n werkaanbod van die Duitse ingenieursmaatskappy DB Schenker vervals. Prasa het ’n teenaanbod gedoen wat meegebring het dat Mtimkulu se jaarlikse verdienste van R1,65 miljoen tot R2,8 miljoen toegeneem het. Montana, destydse groephoof, het dit onderteken. DB Schenker het by navraag van Prasa se prokureurs gesê hulle het nog nooit van Mtimkulu gehoor nie. Mofi het gesê Mtimkulu moet afgedank word.
Omdat die DB Schenker-aanstellingsbrief en sy kwalifikasies vervals is, moet hy van bedrog aangekla word. Hy het die maatskappy uit meer as R15 miljoen bedrieg. Mofi het ook bevestig Prasa het ’n klag teen Mtimkulu by die polisie ingedien en dat hy reeds in hegtenis geneem is. Hy is op borgtog van R20 000 vrygelaat. Mtimkulu sal Vrydag weet wat die uitslag van die tugverhoor is – Netwerk 24

Enjoyed this post? Share it!