‘Son sak oor joernalistiek in SABC”

Thandeka Gqubule, een van die ses geskorste SABC-joernaliste, het Vrydag aan ’n groot groep ondersteuners gesê die son is besig om oor joernalistiek in die SABC te sak.

“Govan Mbeki het ’n boek geskryf oor hoe die son in die middel van die dag kan sak.

“Agter ons sak die son in die middel van die dag op joernalistiek.

 “Dit is nie meer moontlik om ons beroep hier te beoefen nie,” het Gqubule, sakeredakteur van die SABC, gesê.

Sy het die mediagemeenskap bedank dat hulle bereid is om die geskorste werknemers se “dag van rekenskap” te deel en om die nuus te rapporteer “wat dit nie tot op die aand se nuus (by die SABC) gaan maak nie.”

“Dankie dat julle omgee vir die demokrasie waarvoor ons so hard baklei het,” het Gqubule gesê.

Terwyl betogers buite SABC-kantore oor die land heen vir mediavryheid betoog het, het die “SABC-ses” se regspanne hard binne die SABC-gebou in Johannesburg baklei om hul tugsake uit te stel.

Die regspanne was gereed om ’n aansoek by die arbeidshof in Johannesburg in te dien om die tugsake teen die joernaliste te keer as dit nie uitgestel word nie.

Die SABC het daartoe ingestem dat die twee tugsake wat vir Vrydag geskeduleer is, uitgestel word.

Die tugsaak teen Busi Ntuli, uitvoerende vervaardiger van Special Assignment, Krivani Pillay, uitvoerende vervaardiger van SAfm se aktuele programme, en Jacques Steenkamp, senior ondersoekende joernalis, is Vrydagoggend eerste uitgestel.

Kort daarna is die tugsaak teen Foeta Krige, uitvoerende regisseur van Monitor enSpektrum, die programredakteur Suna Venter en Thandeka Gqubule, die SABC se sakeredakteur, ook uitgestel.

Volgens adv. Johan Kruger, een van die regsverteenwoordigers, wou die SABC die saak Vrydag afhandel, maar dit is gekeer.

“Hulle het hul eie beleid oortree deur die joernaliste nie 24 uur te gee om vir die tugsaak voor te berei nie,” sê Kruger. Die volgende stryd is op 11 Julie wanneer aansoek gedoen word dat die ses joernaliste eksterne regsverteenwoordiging in die tugsaak kan hê.

Adriaan Basson, Sanef-woordvoerder oor persvryheid, het by die betoging in Kaapstad gesê dit is nodig dat alle joernaliste hul kollegas by die SABC bystaan.

Hy het ’n plakkaat met die woorde “Sit dit af!” vasgehou en gesê dit is ongehoord dat een persoon – Hlaudi Motsoeneng, omstrede SABC-bedryfshoof – die openbare uitsaaier se beleid bepaal.

Optrede teen joernaliste wat vir onafhanklikheid opstaan gaan nie langer geduld word nie.

“Hlaudi must fall!” het van die groep, wat teen 08:30 tot sowat 100 gegroei het, gesing terwyl motors verby hulle in Seepunt voor die SABC-gebou in Kusweg gery het.

– Verslagspan: Claudi Mailovich, Hannes Kruger en Jan Gerber.

Bron: Netwerk24


 

Enjoyed this post? Share it!