Staat wil sy eie onderbenutte landbougrond nou in produksie stel

Die staat gaan alle onderbenutte landbougrond in sy besit in bewerking bring om grotendeels huishoudelike voedselsekuriteit te verseker, het die Departement van Landelike Ontwikkeling en Grondhervorming aangedui.

Die Parlement se portefeuljekomitee vir landelike ontwikkeling en grondhervorming is ingelig dat hy (die departement) dit gaan vermag met sy een hektaar/een huishouding/ twee koeie program. Die program word gesien as ‘n oplossing om meer landbougrond in bewerking te bring siende dat syfers van Statistiek SA ʼn afname wys in die hoeveelheid huishoudings wat betrokke is by landbouproduksie. Die afname is 19% vanaf 2,9 miljoen in 2011 tot 2,3 miljoen in 2016.

Mnr. Bonginkosi Zulu, waarnemende adjunkdirekteur-generaal vir die herverdeling van grond en ontwikkeling by die departement, het gesê dat die grond wat vir die implementering van die program geteiken word, staatsgrond onder voogdskap van die departement, plase wat die staat proaktief bekom het, restitusiegrond, grond bekom vir plaaswerkers en -bewoners, meentgrond en selfs grond wat onder tradisionele leierskap is.

Baie grond in KZN en Mpumalanga
Heelwat grond in KwaZulu-Natal en Mpumalanga is onder voogdyskap van die staat.

Zulu het verduidelik dat huishoudings heeljaar sal werk deurdat hulle somer- en winterprodukte sal produseer. Die huishoudings sal ook sertifikate vir grondgebruik ontvang wat by die aktekantoor geregistreer sal wees.

Vir die huidige boekjaar wil die departement 6 683 huishoudings help om onbewerkte grond teen ‘n koste van altesaam sowat R269 miljoen in bewerking te bring.

Mnr. Justice Mnguni, ANC-LP, het egter bevraagteken of die departement op ‘n wetenskaplike basis bepaal het hoeveel huishoudings per provinsie gehelp moet word. Hy het gesê dat dit glad nie sin maak dat die departement 1 199 huishoudings in die Noord-Kaap wil help, maar slegs 163 in Gauteng nie. Dit is bekend dat hoewel die Noord-Kaap die grootste provinsie in die land is, dit die laagste bevolking in die land het.

Huishoudings elders
In die Noordwes wil hy 305 huishoudings, Limpopo 1 873, Mpumalanga 615, KwaZulu-Natal 675, Vrystaat 548, die Oos-Kaap 1 025 en die Wes-Kaap 949 huishoudings help.

Mnr. Gugile Nkwinti, Minister van Landelike Ontwikkeling en Grondhervorming, het reeds sedert 2015 die een huishouding/een hektaar program in drie provinsies, die Oos-Kaap, KwaZulu-Natal en Mpumalanga geloods.

Bron: Landbou.com


Enjoyed this post? Share it!